संसदकाे विशेष अधिवेशनबारे कांग्रेस-जसपाबीच वार्ता

१६ असोज, काठमाडौं । कोरोना भाइरसको संक्रमण बढेको निहुँमा सरकारले जनताको मुख थुनेर मनपर्दी गर्न थालेको भन्दै प्रमुख प्रतिपक्षी नेपाली कांग्रेसले खबरदारी गर्ने जमर्काे गरेको छ ।

यही साता कांग्रेसकाे पदाधिकारी बैठकले जनताको आवाज बुलन्द गर्न संसदकाे विशेष अधिवेशन आह्वान गर्नुपर्नेमा जोड दिएको छ ।जनताका समस्या सुन्ने प्रमुख निकाय संसद अधिवेशन रोकेर नेकपा भने सत्ताको चास्नी वितरणको भुलभलैयामा डुबेको छ ।

नेकपा भित्रको अन्तरद्धन्द्ध भागबण्डा गरेर मिलाउन नेताहरु सहमत भएका छन् । सोही बमोजिम मन्त्रिमण्डल पुनर्गठनदेखि राजनीतिक नियुक्तिमा उनीहरु रमाएका छन् । जनप्रतिनिधिहरुलाई मुक दर्शक बनाएर सरकार मनपरी गर्न उद्यत् भएको भन्दै नेपाली कांग्रेसका प्रवक्ता विश्वप्रकाश शर्माले अब सशक्त प्रतिरोध जरुरी भएको बताए ।

कोभिडको त्राश देखाएर जनतालाई कहिलेसम्म चेपुवामा पार्ने भन्दै उनले सरकारको गैरजिम्मेवार प्रवृत्तिको सबै क्षेत्रबाट प्रतिरोध गर्नुपर्ने बताए । सरकार जनताप्रति क्रुर बनेकाले प्रतिपक्षी दल जिम्मेवार हुनुपर्छ भन्दै अब संसदकाे विशेष अधिवेशन बोलाउन लाग्नुपर्ने उनको तर्क छ ।

यसका लागि संसद्मा एक चौथाई सदस्यले लिखित रुपमा माग गर्नुपर्ने संवैधानिक व्यवस्था भएकाले कांग्रेस त्यतातिर अग्रसर भएको पनि प्रवक्ता शर्माले बताए । संविधानको धारा ९३ को उपधारा ३ मा संसदकाे विशेष अधिवेशनबारे उल्लेख गरिएको छ । प्रतिनिधिसभाको अधिवेशन चालु नरहेका बेला एक चौथाई सदस्यले विशेष अधिवेशन बोलाउन बाञ्छनीय छ भनी लिखित आग्रह गरेको खण्डमा राष्ट्रपतिले विशेष अधिवेशन बोलाउने स्थान र मिति तोक्ने छ भनी संविधानमा उल्लेख गरिएको छ ।

उक्त प्रावधान बमोजिम अहिले विशेष अधिवेशन माग गर्न कुल सदस्य संख्याको एक चौथाई अर्थात ६९ जना सदस्यको लिखित हस्ताक्षर आवश्यक पर्छ । तर नेपाली कांग्रेससँग अहिले प्रतिनिधिसभामा ६३ जना सांसद मात्रै रहेको अवस्था छ । त्यसैले हामीलाई बाँकी ६ जना सांसदकाे लिखित हस्ताक्षर आवश्यक छ, त्यो अन्य विपक्षी दलसँग सल्लाह गरेर पूरा गर्ने तयारी भइरहेको जानकारी प्रवक्ता शर्माले दिए ।

यसबारे जनता समाजवादी दलसँग छलफल भइरहेकाले केही दिनमै यसबारे टुंगो लाग्ने पनि उनले बताए । तीन दिनअघि मात्रै कांग्रेस पदाधिकारी बैठकले यस्तो निर्णय गरेको थियो । कांग्रेसको आगामी असोज १९ गते बस्ने केन्द्रीय कार्यसमिति बैठकमा पनि छलफल गरिने उनले बताए ।

यसबारे कांग्रेसले आफ्नो पार्टीसँग सामान्य छलफल गरेको जानकारी जनता समाजवादी दलका नेता राजकिशोर यादवले बताए । सामान्य कुरा भएपनि ठोस रुपमा छलफल हुन बाँकी रहेको भन्दै यादवले कांग्रेसको यो प्रस्तावलाई पार्टीले सकारात्मक रुपमा लिएको बताए । हामी पनि सरकारको पछिल्लो गतिविधिप्रति असन्तुष्ट छौं , त्यसलाई भण्डाफोर गर्न संसदकै विशेष अधिवेशन बोलाएर गर्नुपर्ने आफ्नो राय रहेको उनले बताए ।

विशेष अधिवेशन बोलाइएको अवस्थामा सरकारको भ्रष्टाचार , जनजीविकाको सवालमा भएको बेवास्ता र कोरोनासँग लड्न सरकारले देखाएको लापरबाहीप्रति गम्भिर बहस गरिने नेता यादवले बताए ।