राप्रपा संयुक्तको नाै सदस्यीय वार्ता टोली गठन

१६ असोज, पाँचथर । राष्ट्रिय प्रजातन्त्र पार्टी (राप्रपा) को एकीकरण प्रक्रियाले पाँचथरमा गति लिएको छ । राष्ट्रिय प्रजातन्त्र पार्टी (संयुक्त) को तर्फबाट वार्ता टोली गठन भए यता जिल्ला तहको एकता प्रक्रियाले मूर्त रुप लिन थालेको हो ।

राप्रपा (संयुक्त) र तत्कालीन राप्रपाबीच केन्द्रीय स्तरमा एकता भई निर्वाचन आयोगमा दल दर्ता भएपछि जिल्ला समितिहरूको समायोजन आरम्भ भएको बेला, राप्रपा (संयुक्त) पाँचथरले शुक्रबार वार्ता टोली गठन गरेको हो ।

जिल्ला अध्यक्ष राजकुमार जोशीको अध्यक्षतामा राप्रपा पार्टी कार्यालयमा बसेको बैठकले एकीकरण प्रक्रिया सकारात्मक निष्कर्षमा पुर्याउने हेतुले नाै सदस्यीय वार्ता टोली गठन गरेको छ । उपाध्यक्ष कृष्णबहादुर योङहाङको संयोजकत्वमा गठन भएको समितिले एकताबारे सम्पूर्ण समन्वय र व्यवस्थापन गर्ने बताइएको छ । वैठकमा राप्रपाका केन्द्रीय सदस्य मानदेव केरुङको उपस्थिति रहेको थियो ।

योङहाङको नेतृत्वमा गठन भएको समितिमा उपाध्यक्ष कमल चेम्जोङ, सचिव कमल कुमार राई, कोषाध्यक्ष लक्ष्मी राई लगायत जिल्ला सदस्यहरू नेत्रप्रसाद लावती, कल्पना राई, राम तामाङ, हरी घिमिरे र दल शम्शेर बराइली सदस्य छन् ।

यसैबीच राप्रपा निकट राष्ट्रिय प्रजातान्त्रिक ट्रेड  यूनियन महासंघ नेपालको पाँचथर जिल्ला समितिले देशमा राष्ट्रवादी शक्ति र प्रजातान्त्रिक विकल्पको आवश्यक्ता ठहर गर्दै राप्रपा एकताको स्वागत गरेको छ । ट्रेड  यूनियन महासंघ पाँचथरका अध्यक्ष राम तामाङको अध्यक्षतामा शुक्रबार सम्पन्न बैठकले राप्रपा (संयुक्त) र तत्कालीन राप्रपाका जिल्ला समितिका समायोजन सौहादपूर्ण रहने विश्वास लिएको छ ।