प्रधानमन्त्री निवासको सुरक्षामा खटिएका २८ सुरक्षाकर्मीमा कोरोना

१७ असोज, काठमाडौं । प्रधानमन्त्री केपी शर्मा ओलीका मुख्य सल्लाहकार विष्णु रिमाल, परराष्ट्र मामिला सल्लाहकार डा राजन भट्टराई, प्रेस सल्लाहकार सूर्य थापा र प्रमुख स्वकीय सचिव इन्द्र भण्डारीलाई कोरोना संक्रमण भएको छ ।

शुक्रबार कोरोना परीक्षणका लागि स्वाब दिएकोमा उनीहरुको आज रिपोर्ट पोजेटिभ आएको बताइएको छ । यसैगरी प्रधानमन्त्री निवास बालुवाटारमा सुरक्षामा खटिएका नेपाली सेनाका २८ सुरक्षाकर्मीमा कोरोना संक्रमण पुष्टि भएको छ ।

सेनाका प्रवक्ता सन्तोषबल्लभ पौडेलका अनुसार प्रधानमन्त्री निवासमा खटिए तापनि प्रधानमन्त्रीको प्रत्यक्ष सम्पर्कमा नरहेका सेनाका २८ जनामा कोरोना पोजेटिभ देखिएको हो । कोरोना पुष्टि भएका सुरक्षाकर्मीका स्थानमा अन्य सुरक्षाकर्मी बदली गर्ने कार्य भइरहेको उनले जानकारी दिए ।