कमजोर सिटी, लिड्ससँग बराबरीमै रोकियो

१८ असोज, एजेन्सी । इंग्लिस प्रिमियर लिग फुटबलमा म्यानचेस्टर सिटी कमजोर बन्दै गएको छ । केही दिनअघि लेस्टर सिटीसँग ५–२ गोल अन्तरले हारेको सिटी गएराती लिड्स युनाईटेडसँग एक एक गोलको बराबरीमा रोकिएको हो ।

खेलको १७ औं मिनेटमा रहिम स्ट्रर्लिङले गोल गर्दै सिटीलाई सुरुवाती अग्रता दिलाएका थिए । तर ५९ औं मिनेटमा रोड्रिगो मोरेनोले गोल गर्दै खेल बराबरीमा ल्याए । त्यसपछि सिटीले थुप्रै आक्रमण गरेपनि गोल गर्न भने सकेन् ।

गएको सिजन दोस्रो स्थानमा रहेको सिटी यस बर्ष झन् कमजोर देखिएको छ । यसै बर्ष प्रिमियर लिगमा बढुवा भएको लिड्स भने कडा टिमका रुपमा देखिएको छ ।

यसअघि पहिलो खेलमै लिड्सले च्याम्पियन लिभरपुललाई कडा टक्कर दिएको थियो । खेल ४–३ ले हारेपनि उसले समर्थकको मन भने जितेको थियो । लिड्ससँगको बराबरीसँगै सिटी ३ खेलमा ४ अंकसहित लिगको दशौँ स्थानमा छ । लिड्स ४ खेलमा ७ अंक जोडेर पाँचौं स्थानमा छ ।