नेताहरुमा कोरोना संक्रमण, महत्वपूर्ण बैठक रोकिए

१८ असोज, काठमाडौं । कोरोना कहरको वास्तविक प्रभाव नेपाली राजनीतिक क्षितिजमा बल्ल अनुभूत हुन थालेको छ । प्रधानमन्त्री केपी ओली निवासमा दिनहुँ आवतजावत गर्ने सल्लाहकार टीमदेखि सुरक्षामा खटिएकाहरुमा कोरोना पोजेटिभ देखिएपछि बालुवाटारमा खैलाबैला मच्चिएको छ ।

यद्यपि प्रधानमन्त्री ओली भने अहिलेसम्म सुरक्षित रहेको बताइएको छ । बिहीबार गरिएको स्बाव परीक्षणमा ओलीको रिपोर्ट नेगेटिभ आएको  छ ।  तर बिहीबार र शुक्रबार ओलीले आफ्ना सल्लाहकार टीमसँग निकट छलफल गरेका थिए । तीमध्ये प्रमुख राजनीतिक सल्लाहाकार विष्णु रिमाल, परराष्ट्र सल्लाहकार डा. राजन भट्टराई, प्रेस सल्लाहाकार सूर्य थापा र मुख्य स्वकीय सचिव इन्द्र भण्डारीसँग ओलीले शुक्रबार बाक्लै भेटेको बालुवाटार स्रोतले जनाएको छ ।

त्यसपछि भने ओलीको स्वाब परीक्षण भएको छैन् । त्यसैले ओली उच्च सतर्कताका साथ बालुवाटारमा रहेको बताइएको छ । प्रधानमन्त्रीलाई केही दिन कसैसँग पनि नभेट्न चिकित्सकहरुले सुझाएका छन् । ओलीका निजी चिकित्सक डा. दिब्या सिंह शाहसमेत कोरोना पोजिटिभ भएर आराम गरिरहेकी छन् ।

त्यही भएकाले आज साँझका लागि तय गरिएको नेकपाकाे सचिवालय बैठक अनिश्चित समयका लागि स्थगित भएको छ । आज साँझ ४ बजेका लागि बैठक डाकिएको थियो । हिजैका लागि उक्त बैठक डाकिएको भएपनि ओलीले केही गृहकार्य गर्न बाँकी भन्दै आजका लागि सारेका थिए । तर हिजै बालुवाटारमा कोरोना संक्रमण व्यापक भएको खबर बाहिरिएपछि भने बैठक अनिश्चित भएको हो ।

सल्लाहकार टीममा मात्र नभई सुरक्षाका लागि खटिएका करिब ६० जनामा समेत कोरोना पोजिटिभ देखिएको छ । त्यसैले बालुवाटार अहिले काेराेनाकाे हटस्पट बनेको छ– स्रोतले भन्यो । एकपटक सबैमा त्राश बढेको देखियो ।  बालुवाटारमा फैलिएको यो त्राशले प्रधानमन्त्री ओलीलाई भने राहत दिएको छ । गएको बिहीबार उनले एकलौटी रुपमा राजदूत लगायत राजनीतिक प्रकृतिका नियुक्ति गरेको भन्दै अर्का अध्यक्ष पुष्पकमल दाहाल प्रचण्डसहित नेताहरु झलनाथ खनााल र माधवकुमार नेपाल आक्रोशित भएका थिए ।

उनीहरुकै दबाबमा स्थायी कमिटी बैठक डाकिएको थियो । ओली स्वयं भने बैठक गर्न राजी भएका थिएनन् ।  त्यसैले तत्काललाई राजनीतिक रुपमा भने ओलीको खड्गो केही दिनलाई टरेको छ , तर यो विषय त्यतिकै सेलाउने चाहिं होइन – प्रचण्ड निकट स्रोतले भन्यो । बालुवाटारमा व्याप्त कोभिड आतंक अलि शान्त भएपछि यो सन्दर्भले फेरि राजनीतिक माहोल तताउने छ– स्रोतको भनाई छ ।

उता, प्रमुख प्रतिपक्षी दल नेपाली कांग्रेसका केही शीर्ष नेतामा समेत कोभिड देखिएको छ । वरिष्ठ नेता अर्जुननरसिंह केसी, युवानेता गगन थापालगायत आधा दर्जन केन्द्रीय नेताहरुमा कोभिड भाइरस देखिएपछि भोलिका लागि तय गरिएको केन्द्रीय कार्यसमिति बैठक स्थगित भएको छ । पार्टी कार्यालय नै पाँच दिनका लागि बन्द गर्ने निर्णय गरिएको जानकारी प्रवक्ता विश्वप्रकाश शर्माले दिए ।

भोलिका लागि डाकिएको बैठकपनि अब केही दिनका लागि स्थगित भएको छ तर अर्काे मिति भने पछि तोकिने छ – प्रवक्ता शर्माले भने । भोलिका लागि डाकिएको बैठकमा सहभागी हुने केन्द्रीय सदस्यहरुको स्वाब असोज १५ गते संकलन गरिएको थियो । त्यसमध्ये ६ जना केन्द्रीय सदस्यहरु तथा त्यति नै संख्यामा कर्मचारी एवं सुरक्षाकर्मीमा समेत कोरोना देखिएको छ ।

भोलि बस्ने बैठकले महाधिवेशनको नयाँ मिति तय गर्ने सम्भावना रहेको थियो । त्यस्तै असन्तुष्ट पक्षले उठाएका माग बारेमा पनि छलफल हुने अनुमान गरिएका थियो । आजै मात्र पदाधिकारी बैठक बोलाइएको थियो । तर सो बैठकसमेत स्थगित भएको छ । त्यसैले बैठकको नयाँ मिति पछि तोकिने छ– प्रवक्ता शर्माले भने ।