विदामा घर आएका असईको मोटरसाइकलले ज्यान लियो

१८ असोज, विराटनगर । विदामा घर आएका प्रहरी सहायक निरिक्षकको मृत्यु भएको छ । विदामा घर आएका सशस्त्र प्रहरीका असईको मोटरसाईकलको ठक्करबाट मृत्यु भएको हो । कोशी राजमार्गअन्तर्गत मोरङको बुढीगंगा गाउँपालिका–१ मा सडकमा पैदल हिँडिरहेका ४२ वर्षीय कमलप्रसाद तावाहाङको लु ६१ प २५०२ नम्बरको मोटरसाइकलको ठक्करबाट मृत्यु भएको प्रहरीले जनाएको छ ।

राजमार्ग किनारमा पैदल हिँडिरहेका तावाहाङ आफ्नै सुरमा हिडिरहेका थिए । पछाडीबाट तिब्र गतिमा आएको मोटरसाइकलले उनलाई ठक्कर दिएपछि अवस्था गम्भिर बनेको थियो ।

लगत्तै उनलाई उपचारका लागि विराट मेडिकल कलेज टिचिङ अस्पताल लगिएपनि शनिबार राती मृत्यु भएको अस्पतालले जनाएको छ । तावाहाङ सशस्त्र प्रहरी बल पाँचथरमा कार्यरत असई हुन् । ठक्कर दिने मोटरसाइकलका चालक भने फरार रहेका छन् । उनको खोजी भइरहेको प्रहरीले जनाएको छ ।