भक्तपुरमा बसभित्रै १७ बर्षीया किशोरीमाथि सामूहिक बलात्कार

१८ असोज, भक्तपुर । बसभित्रै भक्तपुरमा १७ वर्षीया किशोरीमाथि सामूहिक बलात्कार भएको छ । भक्तपुर नगरपालिका–८ कालाँचामा १७ बर्षीया किशोरीमाथि ३ जना युवाहरुले बलात्कार गरेका प्रहरीले जनाएको छ ।

रत्नपार्क–भक्तपुर रुटमा चल्ने बा ३ ख २६१२ नम्बरको बसमा ३ जनाले सामूहिक बलात्कार गरेका थिए । बलात्कार गरेपछि तीनै जना युवा फरार भएका थिए भने किशोरीले प्रहरीमा पुगेर जाहेरी दिएकी थिइन् ।

महानगरीय प्रहरी वृत जगातीका डिएसपी राजेश थापाका अनुसार किशोरीको उजुरीपछि सिन्धुपाल्चोक साँगाचोकगढी–१० घर भएका २२ वर्षीय निरकुमार खड्का र जुगल गाउँपालिका–४ घर भएका सुर्य श्रेष्ठ पक्राउ परेका छन् । एक जना भने फरार छन् ।

यसरी भयो बलात्कार

शनिबार किशोरी रत्नपार्कबाट भक्तपुरका लागि गाडी चढेकी थिइन् । गाडी चढेर उनी भक्तपुर डेरा हिडेकी थिइन् । तर उनलाई बाटैमा गाडीका खलासी समेत रहेका बलात्कारी युवाहरुले चक्लेट भन्दै बेहोस हुने ट्याब्लेट खुवाएका थिए ।

युवती बसको सीटमै बेहोस भइन् । भक्तपुरको कालाचाँमा सबै यात्रु सीटबाट झरे । बस एकान्तमा लिएर रोकेपछि खलासी, उनका साथीहरुसहित ३ जनाले किशोरीमाथि पालैपालो बलात्कार गरेका थिए । बलात्कार गर्दै गर्दा युवती होशमा आएपछि भने बलात्कारी युवा त्यहाँबाट फरार भएका थिए ।

बलात्कारी फरार भएपनि उनले नजिकैको प्रहरीमा उजुरी दिएकी थिइन् । प्रहरीका अनुसार ती किशोरी र बसका खलासी समेत रहेका बलात्कारी युवाहरुबीच पहिलेदेखि नै चिनजान रहेको अनुमान गरिएको छ ।

पक्राउ परेका दुई जनामाथि अनुसन्धान चलिरहेको र फरार भएकाको पनि खोजी भइरहेको प्रहरीले जनाएको छ ।