राज्यमन्त्री दुगडको अवैध धन्दाको पर्दाफास ! तत्काल कारवाही गर्न प्रधानमन्त्रीसँग माग

१८ असोज, काठमाडौं । टेबल साल्टका नाममा उपभोक्तामाथि लुट मच्चाएका उद्योग बाणिज्य तथा आपूर्ति राज्यमन्त्री मोतीलाल दुगडलाई कारवाही गर्न उपभोक्ता हित संरक्षण मञ्चले प्रधानमन्त्री केपी शर्मा ओलीसँग माग गरेको छ ।

‘दुगड स्पाइसीज एण्ड फुड्स प्रालि’बाट उत्पादन गरेको भन्दै आयोडीन नुनलाई प्याकेटमा हाली महंगोमा बिक्री गर्ने उद्योग, वाणिज्य तथा आपूर्ति राज्यमन्त्री दुगडको कम्पनीलाई कारवाही गर्न मञ्चले प्रधानमन्त्री ओलीलाई पत्र पठाएको हो ।

वाणिज्य विभागबाट अनुमति नलिइकन अवैध रुपमा टेबल साल्ट बिक्री गर्ने गरेको, खाद्य गुणस्तरबाट समेत अनुमति नलिएर बजारमा उपभोक्तामाथि ठगी गरेकाले मन्त्री दुगड र उनको कम्पनी दुगड स्पाईसीज एण्ड फुड्स प्रालिलाई कारवाही गर्न मञ्चले शुक्रबार पत्र पठाएको हो ।

आयोडीन नुनको उत्पादन र बिक्री वितरण गर्ने अधिकार नेपाल साल्ट ट्रेडिङलाई मात्रै छ । तर साल्ट ट्रेडिङलाई समेत थाहै नदिई दुगडको कम्पनीले आयोडीन नुनलाई ट्याब्लेटमा हालेर १०० ग्राम भएको प्रतिट्याब्लेट नुन दुगडको कम्पनीले ३५ रुपैयाँमा बेच्दै आएको छ ।

एउटा प्याकेटमा ४ वटासम्म ट्याब्लेट हालेर दुगडको कम्पनीले प्रतिप्याकेट १ सय ३२ देखि १ सय ४० रुपैयाँसम्म बिक्री गरिरहेको छ । काठमाडौंका भाटभटेनी, बिगमार्ट लगायतका सुपरमार्केटमा खुलेआम साे साल्ट अवैध रुपमा बिक्री भइरहेपछि नेपालबहस डटकमले समाचार प्रकाशन गरेको थियो ।

नेपालबहसकै समाचार प्रकाशनपछि खाद्य प्रविधि तथा गुण नियन्त्रण विभागले टेबल साल्टमाथि अनुसन्धान शुरु गरेको थियो । मोरङमा रहेको कम्पनीको प्रधान कार्यालयबाट स्याम्पल संकलन तथा कागजात मगाएर विभागले गुणस्तर समेत जाँच गरेको थियो ।

गुणस्तर जाँच तथा अनुसन्धानका क्रममा कम्पनीले टेबल साल्टका लागि अनुमति नलिएको, गुणस्तर परीक्षण नगरेको र बजारमूल्यभन्दा १० गुणा महंगोमा बिक्री गरिरहेको पाइएको थियो ।

साथै वाणिज्य विभागबाट समेत सेन्चुरी मसलाको अनुमति लिएपनि टेबुल साल्टको अनुमति नलिएको पाइएको थियो । एकपछि अर्को गरी महंगो मूल्यमा लुट नै मच्चाउने गरी राज्यमन्त्रीको कम्पनीले अवैध नुन बिक्री गर्दै आएपछि उपभोक्ता हित संरक्षण मञ्चले गुणस्तर विभाग र वाणिज्य विभागमा पत्र पठाएर थप सुचना उपलब्ध गराउन आग्रह गरेको थियो ।

सोहीअनुसार दुगडको कम्पनीले अनुमति नलिएर साल्ट ट्रेडिङको अधिकारको बर्खिलाप आफैले नुन उत्पादन गरेको भन्दै आयोडीन नुन अवैध रुपमा बिक्री गरिररहेको भन्दै प्रधानमन्त्री कार्यालयलाई पत्र लेखेको हो । यसरी उपभोक्तालाई ठगी गर्ने र अवैध नुन बेच्ने दुगड र उनको कम्पनीलाई कारवाही गर्ने मञ्चले प्रधानमन्त्रीलाई पठाएको पत्रमा उल्लेख छ ।

यो पनि पढ्नुहोस :

राज्यमन्त्रीको कुर्सीमा बसेर दुगडको अवैध धन्दा ! उपभोक्तामाथि डकैती शैलीमा लुट !!

‘टेबुल साल्ट’माथि अनुसन्धान शुरु, तर वाणिज्य विभाग जिम्मेवारीबाट पन्छिदै