तास खेलिरहेकै अवस्थामा १३ जना प्रहरी नियन्त्रणमा

१८ असोज, काठमाडौं । नेपाल प्रहरीले काठमाडौं र कैलालबिाट तास खेलिरहेकै अवस्थामा १३ जनालाई नियन्त्रणमा लिएको छ । काठमाडौंको कीर्तिपुर नगरपालिका-९ हनुमानघाटस्थित संगीता श्रेष्ठको घरमा तास खेलिरहेको अवस्थामा कीर्तिपुर नगरपालिका-४ मच्छेगाउँ बस्ने २६ वर्षीय मनिष खतिवडासहित ६ जनालाई शनिबार दिउँसो प्रहरीले पक्राउ गरेको छ ।

संगीताको घरमा तास खेलिरहेको भन्ने खबर प्राप्त हुनासाथ महानगरीय प्रहरी वृत्त कीर्तिपुरबाट खटिएको प्रहरीले उनीहरुलाई नगद १ लाख ५० हजार रुपैयाँ र १ बुक तास सहित फेला पारी पक्राउ गरेको हो ।

यस्तै प्रहरीले कैलाली, धनगढी उपमहानगरपालीका-१३ राजपुरस्थित महाकाली फर्निचर उद्योगमा तास खलिरहेको अवस्थामा ७ जनालाई शनिबार दिउँसो प्रहरीले पक्राउ गरेको छ । पक्राउ पर्नेहरुमा धनगढी उपमहानगरपालिका-१३ बस्ने ५० वर्षीय दिवाकर पाण्डेय, ३४ वर्षीय पुष्कर दत्त पन्त, ३२ वर्षीय नरेश बोहरा, ५८ वर्षीय खिरुराम राना, ३० वर्षीय धिरज साउद, ४३ वर्षीय राम बहादुर साउद र ६३ वर्षीय कृष्णानन्द गिरी रहेका छन् ।

उक्त उद्योगमा तास खेलिरहेको भन्ने सूचनाको आधारमा जिल्ला प्रहरी कार्यालय कैलालीबाट खटिएको प्रहरीले उनीहरुलाई नगद ६१ हजार ३ सय ३० रुपैयाँ र २ गड्डी तास सहित फेला पारी पक्राउ गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ ।