प्रदेशको राजधानी विवादका कारण एमाले सांसदले दिए राजिनामा

१९ असोज, काठमाडौं । प्रदेश ५ सभाको विधान संशोधन मस्यौदा समितिका संयोजक भोजप्रसाद श्रेष्ठले राजीनामा दिएका छन् । आज प्रदेश सभाले प्रदेशको नाम र राजधानीका सम्बन्धमा छलफल गर्ने कार्यसूची छ । प्रदेश सभा बैठक १२ बजेका लागि डाकिएको छ ।

प्रदेशको राजधानी दाङको देउखुरीलाई बनाउने प्रस्तावले सत्तारूढ नेपाल कम्युनिष्टमा तीव्र असन्तुष्टि देखिएको छ । प्रदेशको राजधानी टुंगो लगाउने कुरामा सांसदहरू नै विभाजित भएपछि आज बिहान ७ बजे बोलाइएको नेकपाको संसदीय दलको बैठक अहिलेसम्म सुरू हुन सकेको छैन।

सरकारको निर्णयप्रति असन्तुष्टि जनाउँदै बुटवल २ (क) बाट निर्वाचित श्रेष्ठ एमाले रूपन्देहीका पूर्वजिल्ला अध्यक्ष हुन्। उनले सुरूदेखि नै बुटवललाई राजधानी बनाउनु पर्ने लबिङ गर्दै आएका छन्।