नेकपाको सचिवालय बैठक भोलि दिउँसो बस्ने

१९ असोज, काठमाडौं । सत्तारुढ नेकपाको सचिवालय बैठक भोलि बोलाइएको छ । अध्यक्षद्वय प्रधानमन्त्री केपी शर्मा ओली र पुष्पकमल दाहाल प्रचण्डबीच आज भएको भेटवार्ताले भोलि बैठक बोलाउने निर्णय भएको हो ।

यसअघि हिजो र अस्ति बोलाइएको बैठक तयारी नपुगेको भन्दै स्थगित गरिएको थियो । आइतबार स्थगित भएको सचिवालय बैठक भोलि मंगलबार दिउँसो चार बजे बोलाइएको छ ।

प्रधानमन्त्री ओलीले एकलौटी रुपमा राजदूत र मुख्यसचिव नियुक्त गरेपछि असन्तुष्ट बनेका नेताहरुले सचिवालय बैठक बोलाउन माग गरेका हुन् । केही दिनअघि बसेको मन्त्रिपरिषद बैठकले अमेरिकाका लागि नेपाली राजदुतमा युवराज खतिवडा, बेलायतका लागि लोकदर्शन रेग्मी र मुख्यसचिवमा शंकरदास बैरागीलाई नियुक्त गरेको थियो ।

तर यो निर्णयमा नेकपाका धेरै नेताहरुको असन्तुष्टि छ ।