वडासचिवले महिलामाथि बलात्कार गरे, १० लाख प्रलोभन देखाए !

१९ असोज, जनकपुर । महोत्तरीमा कार्यरत वडासचिवले महिलालाई झाडीमा लगेर बलात्कार गरेका छन् । ३० बर्षीया महिलालाई जंगल नजिकैको झाडीमा लगेर बलात्कार गरेका महोत्तरी भंगहा नगरपालिका वडा नम्बर ९ का सचिव मिथिलेश यादवलाई पक्राउ गरेपछि घटना बाहिर आएको हो ।

शुरुमा यो घटना कसैले पत्याएका थिएनन् । महिलाले प्रहरीमा उजुरी दिएपनि यो घटनालाई यसै सामसुम पार्न खोजिएको थियो । तर प्रहरीले वडासचिवलाई कार्यालयमै पुगेर पक्राउ गरेपछि घटना बाहिर आएको हो ।

ढकिया र टोकरी बनाएर बेच्ने महिलामाथि वडासचिवले जंगलमा पर्ने खोला नजिकैको झाडीमा लगेर बलात्कार गरेका थिए । ढकिया बेचेर घर फर्किन लागेकी महिलालाई उनले बाटोमा रोकेर जबर्जस्ती झाडीमा लिएर बलात्कार गरेपछि पीडित महिलाले प्रहरीमा उजुरी दिएकी थिइन् ।

पीडित महिलाको स्वास्थ्य जाँच गर्दा पनि उनको बलात्कार भएको पुष्टि भएको छ । महोत्तरीका प्रहरी प्रवक्ता प्रकाश विष्टका अनुसार पक्राउ परेका वडासचिव यादवमाथि थप अनुसन्धान शुरु गरिएको छ । तर प्रहरी हिराशतमा परेका वडासचिवलाई छुटाउन उनका आफन्तले महिलालाई १० लाखको प्रलोभन देखाएका छन् ।

१० लाख वा १० कठ्ठा जमीन दिने प्रलोभन देखाएर मुद्दा फिर्ता लिन उनीहरुले भनेका छन् । तर पीडित महिलाले बलात्कार गर्ने वडासचिवमाथि कारबाहीको माग गरेकी छिन् ।