तिलाठी कोइलाडीमा उत्पादनमा बृद्धि ल्याउन ब्यवसायिक खेतीको प्रबद्र्धनका लागि किसान भेला

♦ धीरुभाइ

१९ असोज, सप्तरी । परम्परागत कृषि प्रणालीमा सुधार गरी उत्पादनमा बृद्धि ल्याउन ब्यवसायिक खेतीको प्रबद्र्धनकालागि तिलाठी कोइलाडी गाउँपालिकाले किसान भेला सञ्चालन गरेको छ । तिलाठी कोइलाडी गाउँपालिका वडा नं. ४ कोइलाडीबाट उक्त भेला सुरुवात गरिएको हो । सिमित साधन स्रोतको समुचित प्रयोग गरी बढीभन्दा बढी उत्पादन गर्ने सम्बन्धी प्रविधी तथा तरिकाहरुका बारेमा किसानहरुलाई जानकारी गराउन उक्त भेलाको आयोजना गरिएको गाउँपालिकाका अध्यक्ष सतिशकुमार सिंहले बताए ।

पशुपालन गर्ने कृषकहरुका लागि गाउँपालिकाले सहकारी संस्थामार्फत बिना ब्याजको ५० प्रतिशत ऋण दिने नीति ल्याएको जानकारी गराउँदै अध्यक्ष सिंहले यसबाट कृषकलाई पशुपालन गर्न सहुलियत पुग्ने विश्वास ब्यक्त गरे । गाउँपालिकाले गहुँ, धान, मकै तथा सर्सौंको खेती गर्न प्रोत्साहन गर्ने उद्देश्यले ५० प्रतिशत अनुदानमा बीऊ उपलब्ध गराउने कार्यक्रम ल्याएको बताउँदै अध्यक्ष सिंहले कृषकको सुविधालाई ध्यानमा राखेर खेतीमा आत्मनिर्भर बनाउन गाउँपालिकाले कृषक लक्षित विभिन्न किसीमको कार्यक्रम ल्याएको बताए ।

सो कार्यक्रममा बोल्दै गाउँपालिकाका प्रमुख प्रशासकीय अधिकृत केशवकुमार झाले कृषकलाई सुविधा दिन गाउँपालिकाले विभिन्न कार्यक्रम ल्याएको हुँदा ब्यवसायिक खेतीमा लाग्नुपर्ने आवश्यकता औंल्याए । कृषि ज्ञानकेन्द्र राजविराजका बाली संरक्षण अधिकृत सुब्बालाल मण्डलले कृषि प्राविधिकको सहयोगमा मात्रै कुनै पनि बिषादी प्रयोग गर्नुपर्ने बताउँदै बिना जानकारी बिषादी प्रयोगले मित्र किराहरु समेत मर्ने गरेकोले त्यसबाट किसानलाई नै घाटा हुने जानकारी दिए ।

माटो तथा मल परीक्षण प्रयोगशाला कार्यालय राजविराजका प्रमुख सुनिलकुमार सिंहले खेती गर्ने माटोको जाँच निःशुल्क रहेकोले जाँच गराउन कृषकहरुलाई प्रोत्साहित गरे । माटोमा पोषक तत्व नहुँदा उत्पादनमा कमी आउने बताउँदै प्रमुख सिंहले माटोमा रहेको अम्लियपनको कारण उत्पादनमा कमी आउने भएकोले माटो परीक्षण गराउनु आवश्यक रहेको बताए ।

समयमा मल नपाउनु, बालीमा किरा लाग्ने गरेको, माटो परीक्षण कसरी गर्ने जस्ता किसानहरुले समस्या सुनाएको गाउँपालिकाका कृषि विकास अधिकृत उदयकान्त झाले बताए । गाउँपालिकाको वडा नं. ४ कोइलाडीबाट सुरु गरिएको किसान भेला आठ वटै वडाहरुमा गरिने जानकारी दिंदै अधिकृत झाले मंगलबार वडा नं. ७ मन्सापुर, बुधबार वडा नं. ५ को. बर्साइन र विहिबार वडा नं. ८ तोपामा किसान भेला राखिएको बताए ।