डा. केसीका माग पुरा गर्न जनसम्पर्क समिति अमेरिकाको सरकारसँग अपिल

२० असोज, अमेरिका । डा. गोविन्द केसीको २३ दिन अगाडि जुम्लाबाट शुरू भएको अनशन काठमाडौंको शिक्षण अस्पतालमा पुग्दा अनशनरत डा.केसीको स्वास्थ्य अवस्था गम्भीर बन्दै गएको प्रति नेपाली जनसम्पर्क समिति अमेरिकाले गम्भीर ध्यानाकर्षण भएको जनाएको छ ।

जनसम्पर्क समितिका महासचिव मुनिन्द्र नेम्बाङले एक विज्ञप्ति प्रकाशित गर्दै भनेका छन् “नेपालको चिकित्सा शिक्षामा आमुल सुधारका माग राखी सत्याग्रही अनशनरत डा.केसीप्रति सरकारले प्रस्तुत गरेको व्यवहार अमानवीय, अपमानजनक र अनुदार भएको ठहर गर्दै, सरकारको यस किसिमको रवैया र दुव्यर्वहारप्रति समिति घोर निन्दा र भत्सर्ना गर्दछ ।”

विगतमा अनशनरत डा. गोविन्द केसीका मागहरूलाई नेपाली कांग्रेसको पालामा सम्बोधन गर्दै “राष्ट्रिय चिकित्सा शिक्षा अध्यादेश, ०७४” जारी गरिएको कुरा सबैलाई सर्वविदितै रहेको जनाउँदै सो विज्ञप्तिमा त्यही अध्यादेशको जगमा टेकेर अनशनरत डा. केसीले अहिले उठाएका जायज मागहरूलाई पूरा गर्न र उहाँको जीवन जोगाउन नेपाली जनसम्पर्क समिति अमेरिका नेपाल सरकारसँग जोडदार माग गर्दछ, भनिएको छ ।