रुपन्देहीका २ हजार बढी कार्यकर्ताद्धारा नेकपा परित्यागको घोषणा

२० असोज, बुटवल । प्रदेश राजधानी विवादकै क्रममा रुपन्देहीका २ हजार कार्यकर्ताले नेकपा परित्यागको घोषणा गरेका छन् । प्रदेश ५ को राजधानी दाङ सार्ने प्रस्तावको विरोध गर्दै सत्तारुढ नेकपाका दुई हजार बढी कार्यकर्ताले पार्टी परित्याग गर्ने घोषणा गरेका छन् ।

बुटवलमा पत्रकार सम्मेलन गरी नेकपाका ३५ संस्थामा आवद्ध २२ सय ४९ जना पार्टी सदस्यले पार्टी छाडेको घोषणा गरेका हुन् । नेकपा छाड्नेमा रुपन्देही ब्यापार संघ, रुपन्देही उद्योग संघ, होटल तथा रेष्टुरेन्ट व्यवसायी संघ, पश्चिम नेपाल बस व्यवसायी प्रालिलगायतका संस्थामा आवद्ध पार्टी सदस्यहरुले नेकपा छाडेका हुन् ।

उनीहरुले पार्टीका सांसदहरुले मतदाता र कार्यकर्तासामु चुनावमा गरेका प्रतिवद्धता बिर्सेर बुटवलबाट राजधानी दाङ सार्न लागेकाले पार्टीमा बस्नुको औचित्य नभएकाले पार्टी परित्याग गरेको घोषणा गरेका हुन् ।

राजधानी सार्ने प्रस्तावका सन्दर्भमा पार्टीका नेताहरुको लाचारीपनले गर्दा आउंदो चुनावमा नेकपाले लज्जास्पद हार व्यहोर्ने पनि उनीहरुले चेतावनी दिएका छन् । उनीहरु स्वतन्त्र रहने बताएपनि कांग्रेसमा प्रवेश गर्ने सम्भावना छ ।