अनसनको २३ औँ दिन शिक्षण अस्पताल पुगेर शिक्षा सचिवले भने- ‘डा.केसी ज्यू, अनसन रोक्नुस’

२० असोज, काठमाडौं । अनसन बसेको २३ औँ दिनमा शिक्षा सचिव गोपीनाथ मैनाली लगायत ३ जना डा.गोविन्द केसीलाई भेट्न शिक्षण अस्पताल पुगेका छन् । सरकारका तर्फबाट अहिलेसम्म औपचारिक वार्ता समिति नबनेको भएपनि उनीहरु अस्पतालमै पुगेर डा.केसीलाई अनसन रोक्न आग्रह गरेका छन् ।

सरकारले वार्ता टोली गठन नगरेसम्म आफूहरुले वार्ता गर्न नसक्ने भन्दै उनीहरुले स्वास्थ्य अवस्था जटिल बन्दै गएका कारण अनसन रोक्न डा.केसीलाई आग्रह गरेका थिए । तर डा.केसीले अनसन नरोक्ने जवाफ फर्काए ।

साथै डा.केसीले वार्ताका लागि तत्काल समिति बनाएर आउन पनि भनेका छन् । गएको भदौ २९ गतेदेखि डा.केसीले शुरु गरेको अनसन २३ औँ दिनसम्म पुग्दा स्वास्थ्य अवस्था जटिल बन्दै गएको छ । तर सरकारले भने अहिलेसम्म बेवास्ता गर्दै आएको छ ।