तीन जना मन्त्री थप्ने प्रधानमन्त्री ओलीको तयारी

२० असोज, काठमाडौं । आज साँझका लागि नेकपाले सचिवालय बैठक नराखेको भए प्रधानमन्त्री केपी ओलीले मौजुदा मन्त्रिमण्डलमा तीन सदस्य थप्ने गृहकार्य गरेका थिए । हिजो साँझ ओलीले यसबारे अर्का अध्यक्ष पुष्पकमल दाहाल प्रचण्डलाई जानकारी दिएका थिए । तर प्रचण्ड भने रिक्त मन्त्रालयमा मात्रै पूर्ति गर्ने भन्दा पुनर्गठन नै गर्दा उपयुक्त हुने भन्दै पन्छिएका थिए ।

भोलि ( आज )का लागि सचिवालय बैठक निर्धारण भएकाले सल्लाह गरेर मात्रै अगाडि बढ्न प्रचण्डले सल्लाह दिएको खुमलटार निकट स्रोतले बतायो । जवाफमा ओलीले मन्त्री नियुक्तिको विषयमा प्रधानमन्त्रीलाई नियन्त्रण गर्न खोज्नु गलत भएको भन्दै यसबारे धेरै कचकच नगर्न प्रचण्डलाई सुझाव दिएको पनि स्रोतको दाबी छ ।

हिजोको वार्ता अलि तनावपूर्ण नै रह्यो भन्दै स्रोतले प्रचण्डले पनि कडै कुरा गरेको बतायो । प्रचण्डले ओलीलाई भनेका थिए– मन्त्री मात्र होइन, राजनीतिक नियुक्ति गर्ने अधिकार क्षेत्र पनि तपाईं कै हो, आफूखुशी गर्नाेस्, तर त्यसमा मेरो कुनै समर्थन र साथ रहने छैन ।

प्रचण्ड लगायत नेकपाका अधिकांश सचिवालय सदस्यहरु मन्त्रिमण्डलमा आमूल परिवर्तन गर्ने पक्षमा रहेका छन् । मिलेसम्म सचिवालयले नै मन्त्री र पोर्टफोलियो तोक्ने पक्षमा उहाँहरु हुनुहुन्छ, तर प्रधानमन्त्रीले त्यस्तो प्रस्ताव स्वीकार्नु हुनेछैन – बालुवाटार निकट स्रोतले भन्यो ।

आज साँझ सचिवालयमा कुरा मिलेन भने भोलिसम्ममा प्रधानमन्त्रीले रिक्त रहेका तीन मन्त्रालयमा मन्त्री तोक्ने सम्भावना रहेको पनि स्रोतले बतायो । हाललाई अर्थ मन्त्रालयमा विष्णु पौडेल, सञ्चारमा जनार्दन शर्मा र सहरी विकासमा महेश बस्नेतलाई ल्याउने पक्षमा ओली रहेको पनि बताइएको छ ।

तर प्रचण्डसँग कुरा नमिलेकाले शर्मा मन्त्री बन्ने नबन्ने प्रष्ट भएको छैन । साथै, माधव नेपाल पक्षका नेता सुरेन्द्र पाण्डेलाई पनि प्रधानमन्त्री कार्यालयबाट सहरी विकास मन्त्रालय अफर भएको तर पाण्डेले अर्थ नपाए मन्त्री नखाने जवाफ दिएको बताइएको छ ।

अहिलेलाई खाली मन्त्रालय पूर्ति गरौं, बाँकी सहमति जुटेपछि गरौंला भन्ने ओलीले प्रस्ताव गर्दासमेत प्रचण्डले अस्वीकार गरेकाले परिस्थिति अली जटिल भएको पनि स्रोतले बतायो । प्रचण्ड पक्षले नमानेपनि हाललाई तीनवटै मन्त्रालयमा मन्त्री राखेर काम गर्ने पक्षमा ओली रहेकाले भोलिसम्म केही मन्त्री थपिने सम्भावना रहेको हो ।