खतिवडासहित ओलीले बनाएका राजदूतविरुद्ध उजुरी आह्वान

२१ असोज, काठमाडौं । प्रधानमन्त्री केपी शर्मा ओलीको जोडबलमा राजदूत प्रस्ताव गरिएका तीन जनाविरुद्ध संसदीय सुनुवाई समितिले उजुरी आह्वान गरेको छ । सरकारले असोज १६ गते पूर्वअर्थमन्त्री डा. युवराज खतिवडालाई अमेरिका, निवर्तमान मुख्यसचिव लोकदर्शन रेग्मीलाई बेलायत र डा. निर्मलकुमार विश्वकर्मालाई दक्षिण अफ्रिकाका लागि नेपाली राजदूतमा सिफारिस गरेको थियो ।

प्रस्तावित तीनै जना राजदूतविरुद्ध समितिले बुधबार उजुरी आह्वान गरेको हो । बुधबार बसेको सुनुवाई समितिको बैठकले तीनै जनाविरुद्ध उजुरी दिन १० दिनको समय दिएर सूचना प्रकाशित गरेको छ । कात्तिक ३ गतेसम्म उजुरी दिन सकिने समिति सचिवालयले जनाएको छ ।

सूचनामा सिफारिस गरिएका व्यक्तिलाई राजदूत नियुक्त गर्न उपयुक्त छैन भन्ने लागेमा स्पष्ट आाधार एवं सबुद प्रमाणसहित उजुरी दिन भनिएको छ । उजुरीकर्ताको परिचय भने गोप्य राखिने गरेको छ । संसदीय सुनुवाई समितिबाट अनुमोदन भएपछि राष्ट्रपतिले राजदूत नियुक्त गर्ने संवैधानिक प्रस्ताव छ ।