जाजरकोट जीप दुर्घटना : वडाध्यक्षसहित ६ जनाको मृत्यु, १ बेपत्ता, १ घाइते !

२१ असोज, सुर्खेत । जाजरकोटको औलभीरमा भएको जीप दुर्घटनामा मृत्यु हुनेको संख्या ६ पुगेको छ । सदरमुकाम खलंगाबाट जुनिचाँदे जाँदै गरेको जीप औल भीरमा दुर्घटना हुँदा वडाध्यक्षसहित ६ जनाको मृत्यु भएको प्रहरीले जनाएको छ ।

मृत्यु हुनेमा जाजरकोटको जुनिचाँदे गाउँपालिका ११ का वडाध्यक्ष अमर बहादुर शाही, महेन्द्र मावि कोर्ताङका विद्यालय व्यवस्थापन समितिका अध्यक्ष कृति बहादुर शाही, मेडिकल सुपरिटेन्डेन्ट लालबहादुर बुढा, गर्खाकोट स्वास्थ्य चौकीका अहेव खेमराज शाही, स्थानीय मटेलाका मालिका बस्नेत, अहेव कृष्णबहादुर शाही रहेका छन् । एक जना नदीमा बेपत्ता भएको अनुमान गरिएको छ ।

दुर्घटनामा घाइते स्थानीय शिक्षक नरबहादुर शाहीलाई उपचारका लागि सुर्खेत पठाइएको छ । जाजरकोटकै मटेलाका गोरखबहादुर बस्नेतको जीप लिएर वडाध्यक्षसहितको टोली जुनिचाँदे जाँदै गर्दा दुर्घटनामा परेको हो ।

अहिले पञ्चला प्रहरीको टोली घटनास्थलमा मुचुल्का उठाउने र बेपत्ताको खोजी गरिरहेको छ । घटनास्थलबाट शव उठाउन र बेपत्ताको खोजीका लागि वडावनदेखि प्रहरीको थप टोली झिकाइएको छ ।