शिक्षिकामाथि नै बलात्कार प्रयास, अश्लील हर्कत गर्ने शिक्षक प्रहरी हिराशतमा !

२१ असोज, दाङ । समाजमा शिक्षकलाई सबैभन्दा उच्च श्रेणाीको व्यक्ति मानिन्छ । डाक्टर र इन्जिनियर आफ्नो पेशागत काममा उत्कृष्ट मानिएपनि गाउँघर वा शहर बजारमा शिक्षकलाई विवेकी र समाजको अग्रणी व्यक्तिका रुपमा दर्जा दिइन्छ् ।

तर सबै शिक्षक उस्तै कहाँ हुन्छन् र ? दाङमा शिक्षिकालाई यौनांग देखाउँदै जिस्किने बानी परेका शिक्षक प्रहरी हिराशतमा परेका छन् । सहकर्मी महिला शिक्षकलाई यौनांग देखाउने जस्तो अश्लिल हर्कत गर्ने घोराहीमा रहेको सिद्धार्थ एकेडेमीमा कार्यरत शिक्षक शिवकुमार रानालाई प्रहरीले पक्राउ गरेर हिराशतमा लिएको हो ।

आरोपित शिक्षकले पटक–पटक सहकर्मी महिला शिक्षकलाई गलत नियतले अश्लिल क्रियाकलाप गरेपछि ती शिक्षिकाले भिडियो खिचेर सामाजिक सञ्जालमा पोष्ट गरेकी थिइन् । पछि उनले प्रहरीमा समेत उजुरी दिएपछि अश्लील हर्कत गर्ने शिक्षक पक्राउ परेका हुन् ।

शिक्षक रानाले एक्लै भएको बेला बलात्कार प्रयास गर्नका लागि यौनांग देखाउने जस्तो अश्लील हर्कत गर्ने गरेको पीडित शिशिक्षकाले बताएकी छन् ।

जिल्ला प्रहरी कार्यालय दाङका प्रवक्ता सुमित खड्काका अनुसार पक्राउ परेका शिक्षकमाथि अनुसन्धान शुरु गरिएको छ । मुलुकी अपराध संहिताका अनुसार सार्वजनिक स्थलमा यौनांग देखाउनेलाई ६ महिना कैद वा ५ हजार रुपैयाँसम्म जरिवाना हुने व्यवस्था छ ।

शिक्षिकामाथि अश्लील हर्कत गर्ने राना पक्राउ परेपछि सिद्धार्थ एकेडेमीले पनि उनलाई बर्खास्त गरेको छ ।