अबैध हतियारमा स्याङ्जा प्रहरीको निगरानी, भरुवा बन्दुकसहित २ जना पक्राउ

२१ असोज, स्याङ्जा । अबैध रुपमा हातहतियार राख्ने विरुद्ध स्याङ्जा प्रहरीले स्ट्रिङ अपरेसन चलाएको छ । कोभिड १९ को मौकामा प्रहरी प्रशासन शान्तिसुरक्षा तथा संक्रमण न्युनिकरण गर्न खटिरहेका बेला अपराधिक क्रियाकलाप हुनसक्ने भन्दै प्रहरीले स्ट्रिङ अपरेशन चलाएको हो ।

पछिल्लो समय जिल्ला प्रहरी कार्यालय स्याङ्जाले अबैध हातहतियार राख्नेतर्फ निगरानी बढाएको छ । प्रहरीले चलाएको स्ट्रिङ अपरेसनमा अबैध हतियार राख्ने दुईजनालाई पक्राउ परेका छन् । भरुवा बन्दुकसहित प्रहरीले पुतलीबजार नगरपालिका ६ बस्ने ६६ बर्षका थमन गुरुङ् र २० बर्षका सुजन गुरुङ्लाई पक्राउ गरेको जिल्ला प्रहरी कार्यालय स्याङ्जाका प्रवक्ता प्रहरी नायव उपरिक्षक राजेन्द्रप्रसाद अधिकारीले जानकारी दिए ।

थमन गुरुङको साथबाट एकथान अबैध भरुवा बन्दुक, भरुवा बन्दुकको नाल एक थान, बारुद थान १४५ ग्राम, टिनको स—साना पाता ११ वटा, केप ५ थान, काँचो सिसा १५६ वटा नियन्त्रणमा लिईएको प्रवक्ता नायव उपरीक्षक अधिकारीले बताए । त्यस्तै सुजन गुरुङको साथबाट एक नाले भरुवा बन्दुक नियन्त्रणमा लिईएको प्रहरीले जनाएको छ ।

उनीहरु दुवै जनालाई जिल्ला अदालतबाट २५ दिनको म्याद थप गरी अनुसन्धान शुरु गरिएको प्रहरीले जनाएको छ । चाडवाड नजिकिदै गर्दा शान्तिसुरक्षामा कुनै कसुर बाँकी नराख्ने प्रतिवद्धता व्यक्त गरेका जिल्ला प्रहरी प्रमुख होविन्द्र वोगटीले सुरक्षा गस्ती बढाएको बताएका थिए ।

सुरक्षा गस्ती बढाएसँगै अबैध हतियार राख्ने व्यक्ति प्रकाउ परेका हुन् । अदालतले सजाय तोकेका फरार अभियुक्त धमाधम पक्राउ गर्न सफल भएको जिल्ला प्रहरी कार्यालयले सामाजिक, आर्थिक, भौतिक, प्राकृतिक लगायतका बिषयमा खलल् पु¥याउने व्यक्तिलाई नछाड्ने अडानका साथ अगाडी बढेको देखिन्छ ।

प्रवक्ता अधिकारीका अनुसार जिल्ला प्रशासन कार्यालय स्याङ्जाबाट अनुमति नलिएका र नविकरण नगरी अबैध रुपमा राखिएका आर्थिक बर्ष २०७७/०७८ को साउनदेखि असोज सम्म ८ नाल भरुवा बन्दुक र ६ जनालाई पक्राउ गरिएको छ । अबैध रुपमा अझै धेरै संख्यामा हतियार रहेको प्रहरीले आशंका गरेको छ । तिब्र रुपमा गस्ति बढाएको प्रहरीले अबैध धन्दामा जोसुकै परेपनि नछाड्ने जनाएको छ ।