दशैंँमा अर्को महंगी : तेल, दाल र गेडागुडीको मूल्य बढ्यो

२२ असोज, काठमाडौं । कोरोनाले थलिएका बेला बजारमा झन् महंगी बढेको छ । दशैंँको मुखमा व्यापारीले खाने तेल, दाल र गेडागुडीको मूल्य बढाएका छन् । खुद्रा व्यापार संघले दालमा प्रतिकिलो १० रुपैयाँ, हरियो केराउमा ३५ रुपैयाँ तर तेल प्रतिलिटरमा १५ रुपैयाँ मूल्य बढाएको हो ।

लकडाउनका कारण उद्योग बन्द हुँदा बजारको माग अनुसार उत्पादन र आयात नभएकाले नभएकोले मूल्य बढाइएको संघले जनाएको छ । लकडाउनअघि १५ सय ८० रुपैयाँमा पाइने एक दर्जन सनफ्लावर तेलको मूल्य अहिले १६ सय २० रुपैयाँ नाघेको छ ।

पहिले एक लिटर तेलका लागि १५६ रुपैयाँ पर्नेमा अहिले होलसेलले १६३ रुपैयाँ लिने गरेको छ । यस अघि २५५ रुपैयाँ प्रतिलिटरमा पाइने तोरिको तेलको मूल्य २६५ सम्म पुर्‍याइएको छ ।

तेलको प्याकेटमा एमआरपी २७० लेखेका कारण धेरै ठाउँमा सोहीअनुसार मूल्य कायम भएको हुन सक्ने संघको अनुमान छ । १६० रुपैयाँमा पाइने भटमासको तेलको भाउ पनि दसैँको पूर्वसन्ध्यामा लिटरमै पाँच रुपैयाँ बढेको छ ।

मासको कालो दाल प्रतिकिलो १३५ बाट बढेर १४५ रुपैयाँ पुगेको छ । यस्तै मुसुराको रातो दाल किलो मै १० रुपैयाँले बढेको खुद्रा व्यपारीहरुले बताएका छन् । केही समयअघि एक सय २२ रुपैयाँमा पाइने उक्त दालको प्रतिकलो मूल्य १२२ रुपैयाँ पुगेको छ ।

फ्याक्ट्रीमा ६ महिना अगाडि बनेको उत्पादनमा धेरै अधिकतम् खुद्रा मूल्य राखेर पछि बिस्तारै होलसेलले मूल्य बढाउँदै लगेको साना व्यवसायीहरु बताउँछन् ।

तर नेपाल तेल, दाल, चामल संघले भने अन्तर्राष्ट्रिय बजारमा कच्चा पदार्थको भाउ बढेको र माग पनि उच्च हुँदा मूल्य बढेको दाबी गरेको छ । नेपालमा तेल, दालको कच्चा पदार्थ धेरै मात्रामा विदेशबाट आयात हुने गरेको र अन्तर्राष्ट्रिय बजारमा परेको अरि नेपालमा देखिएको संघले जनाएको छ ।