छोटे गुण्डाको हातै काटिदिने गुण्डा नाइके राधे भण्डारी पक्राउ

२३ असोज, काठमाडौं । गुण्डा नाइके राधे भण्डारीलाई प्रहरीले पक्राउ गरेको छ । सिद्धलेक गाउँपालिकाका जनप्रतिनिधिलाई धम्की दिएपछि जिल्ला प्रहरी कार्यालय, धादिङले राधेलाई पक्राउ गरेको हो ।

डीएसपी लोकनाथ तिम्सिनाका अनुसार बालुवा निकाल्ने ठेक्काको म्याद सकिएपछि पनि उनले अवैध तरिकाले बालुवा निकालिरहेका थिए । जनप्रतिनिधिलाई त्यसलाई रोक्न भनेपछि भण्डारीले धम्की दिएपछि उनलाई पक्राउ गरिएको हो ।

राधेलाई पक्राउ गर्न गाउँपालिकाका प्रतिनिधिले जिल्ला प्रशासन कार्यालय, धादिङमा उजुरी दिएका थिए । गुण्डा नाइके राधे नेपाली कांग्रेस निकट तरुण दलको जिल्ला उपाध्यक्ष समेत हुन् । उनी गएको जेठमा पक्राउ परेका थिए ।

राधे नामी गुण्डा नाइके भएपनि ०७० असार २१ मा धादिङबाट काठमाडौंमा फर्किन लागेका अर्का गुण्डा नाइके दिनेश अधिकारी चरीलाई लुकेर गोली हानेका थिए । गोली लागेपनि चरी भने भाग्न सफल भएका थिए । तर त्यसपछि राधेको चर्चा चुलियो । त्यसअघि राधेले चरी समूहका एक जनाको हात नै काटिदिएका थिए ।

धादिङका दुवै गुण्डा नाइकेबीच ठूलो दुष्मनी थियो । तर नेताहरुलाई समेत धम्की दिन थालेका चरीलाई प्रहरीले २०७१ साउन २१ गते भीमढुंगामा इन्काउन्टर गरेको थियो । त्यसपछि यी दुईको दुष्मनी मात्रै सकिएन । त्यसयता धादिङमा राधेको बर्चश्व चलिरहेको छ ।