कोरोनाले कांग्रेस संस्थापक नेता खनुपरुदेको निधन

२३ असोज, काठमाडौं । नेपाली कांग्रेसका संस्थापक एवं जीवनपर्यन्त नेपाली कांग्रेसको सक्रिय राजनीति गरेका खनुपरुदे ( रामबाबु प्रसाईं ) को आज निधन भएको छ । श्वासप्रश्वासको समस्याले ग्रस्त भएका प्रसाईंको आजै अपरान्ह उपचारका क्रममा चावहिलस्थित ओम अस्पतालमा निधन भएको हो ।

सय वर्ष लागेका प्रसाईंलाई पछिल्लो समय कोरोना संक्रमण भएको थियो । प्रसाईंकी श्रीमतीसमेत कोरोना संक्रमणको चपेटामा आएको अस्पताल स्रोतले बताएको छ ।

नेपाली कांग्रेसका संस्थापक सदस्य मध्येका उनी राणाविरोधी आन्दोलनदेखि पञ्चायतकालसम्म कांग्रेस राजनीतिमा सक्रिय थिए ।  उनी ०२८ देखि ०४८ सम्म झापा जिल्ला कार्यसमिति सभापति थिए ।

०४८ मा झापाको कलबलगुढीमा सम्पन्न आठौं महाधिवेशनपछि उनी सभापति कृष्णप्रसाद भट्टराईको कार्यसमितिमा केन्द्रीय कोषाध्यक्ष रहे । ०५२ सालमा उनले कोषाध्यक्षबाट राजीनामा गरेका थिए ।

कांग्रेस संस्थापक नेताहरु बीपी कोइराला, सुवर्णशम्शेर, गणेशमान सिंह लगायत नेतासँग प्रसाईंको राम्रो हिमचिम थियो । ०६२ सालमा नेपाली कांग्रेसले संवैधानिक राजतन्त्रको लाइन छाडेपछि भने उनी कांग्रेसबाट अलग भएका थिए । पछिल्लो समय उनी कुनै राजनीतिक दलसँग आवद्ध थिएनन् ।

प्रसाईंको शव आजै साँझ नेपाली सेनाले व्यवस्थापन गर्ने छ । उनका श्रीमती , तीन छोरा र दुई जना छोरी छन् ।

उनमा आँखा राम्ररी नदेखेपनि कान र स्मृति शक्ति वेजोड थियो । विसं २००० यताका अनेक सन्दर्भ, नेपाली कांग्रेस, त्यहाँका नेता, कम्युनिस्टहरु, राजा र राजनीति अनेककन विषयका जानकार उनको वर्तमान संविधानबारे स्पष्ट असहमति थियो ।

रामबाबु प्रसाई (खनुपरुदे) अत्यन्त अनुशासित, सहयोगी, र विवेकशील थिए । संकटका बेला उनको सह्रृदयताको प्रशंसा हरेकले गर्छन् र गर्नुपर्ने हुन्छ । झापाका जमिन्दार रहेका प्रसाई कांग्रेसका दाता पनि थिए । प्रतिबन्धितकालमा पार्टी सञ्चालन गर्न उनले ठूलो धनराशी खर्च गरेका थिए ।

स्वर्गीय प्रसाई नेपालको प्रजातान्त्रिक आन्दोलनमा निष्ठाको नाम हो । ९९ वर्षसम्मको आयुमा प्राञ्जल छवि रह्यो उनको । नेपालबहस डटकम पनि यस दुखद घडीमा उनको दिवंगत आत्माले चिरशान्ति पाओस् भन्दै शोकसन्तप्त परिवारजनमा हार्दिक समवेदना प्रकट गर्दछ ।