आइसोलेशनमा बसेका संक्रमितलाई हाइजेनिक किड्स वितरण

२४ असोज, टीकापुर । कैलालीको टीकापुरमा आइसोलेशनमा बसिरहेका कोरोना संक्रमितलाई टीकापुर नगरपालिकाले हाइजेनिक किड्स वितरण गरेको छ । नगरपालिकाले टीकापुरको सिटीहल र टीकापुर अस्पतालमा रहेको कोरोना संक्रमितलाई हाइजेनिक किड्स वितरण गरेको हो । निड्स नेपाल कञ्चनपुरको सहयोगमा ४६ जनालाई किड्स वितरण गरिएको टीकापुर नगरपालिकाका स्वास्थ्य शाखा प्रमुख बलबहादुर रावलले जानकारी दिए ।

यस्तै नेपाल रेडक्रस सोसाइटी कैलाली शाखाको सहयोगमा १५ जनालाई हर्लिक्स पनि वितरण गरिएको छ । आइसोलेशनमा रहेका महिला र बालबालिका गरी १५ जनालाई आधा किलोको दरमा हर्लिक्स वितरण गरिएको हो ।

टीकापुर नगरपालिकाका संक्रमितको सङ्ख्या २०२ पुगेको छ । ५५ जना कोरोना संक्रमण निको भएर घर फर्किएका छन् भने टीकापुरमा सक्रीय संक्रमितको सङ्ख्या ४७ रहेको छ । संक्रमितमा पनि २८ जना अस्पतालको आइसोलेशनमा र १९ जना सेल्फ आइसोलेशनमा बसेका छन् ।