साझा पार्टीको प्रवक्तामा शरदराज पाठक नियुक्त

२४ असोज, काठमाडौं । साझा पार्टीको प्रवक्तामा शरदराज पाठक नियुक्त भएका छन् । गएको तीन वर्षदेखि सहप्रवक्ताको जिम्मेवारी निभाउँदै आएका पाठक साझा पार्टीको प्रवक्तामा नियुक्त भएका हुन् ।

उनलाई सहप्रवक्तामा नियुक्त गरिएको बारे संयोजक रविन्द्र मिश्रले सामाजिक सञ्जाल फेसबुकमार्फत जानकारी गराएका हुन् । ग्रामिण विकासमा स्नातकोत्तर गरेका पाठकले साझा पार्टीमा सकृय हुनअघि विभिन्न सञ्चारमाध्यममा सम्पादकीय नेतृत्व गरेका थिए।

उनले अष्ट्रेलियामा रहँदा अष्ट्रेलियाको नेपालीपत्रको संस्थापक सम्पादक भएर काम गरेका थिए भने त्यसअघि उनी नेपालमा कालिका एफएम तथा रेडियो अन्नपूर्ण नेपालको समाचार प्रमुख र कान्तिपुर एफएमको सम्पादकीय टोलीका सदस्य थिए। उनी गत संघीय निर्वाचनमा पार्टीको तर्फबाट चितवन क्षेत्र नं ३ का उमेदवार थिए।