वार्ताबाट पन्छियो सरकार, आफ्नो ज्यान बचाउन डा.केसीलाई आग्रह

२४ असोज, काठमाडौं । तीन दिनअघि गठन भएको सरकारी वार्ता टोली अनसनरत डा. गोविन्द केसी पक्षको छलफलबाटै पन्छिएको छ । गएराती बसेको वार्ता निष्कर्षविहिन भएपछि सरकारी वार्ता टोलीेले आफ्नो ज्यान आफै बचाउन डा.केसीसँग आग्रह गरेको छ ।

शिक्षा सचिव गोपी मैनाली नेतृत्वको सरकारी वार्ता टोलीले शनिबार वत्तव्य जारी गर्दै सहमतिको प्रयास सफल नभएपछि अब अनसन स्थगित गर्न डा.केसीलाई आग्रह गरेको हो ।

साथै टोलीले डा.केसीले उठाएका माग पूरा हुने चरणमा रहेकाले आजको भोलि नै कुनै माग सम्बोधन गर्न नसकिने पनि बताएको छ । सरकारी वार्ता टोलीका अनुसार कर्णाली स्वास्थ्य विज्ञान प्रतिष्ठानमा एबीबीएस कार्यक्रम सञ्चालन गर्न चिकित्सा शिक्षा आयोग समक्ष स्वयंम मुल्यांकन प्रतिवेदन पेश भइसकेको छ ।

प्रत्येक प्रदेशमा सरकारी मेडिकल कलेज स्थापना गर्न बर्दिबास, बुटवल र सुर्खेतमा जग्गा प्राप्ति र गुरुयोजना स्वीकृत भइसकेको छ भने वातावरणीय प्रभाव मूल्यांकन स्वीकृतिको अन्तिम चरणमा रहेको वक्तव्यमा उल्लेख छ ।

तर डा. गोविन्द केसी पक्षको वार्ता टोलीले भने सरकारी टोली वार्ताबाट पन्छिएको र डा.केसीलाई मरोस भनेर छाडिदिन चाहेको बताएको छ ।