आकस्मिक र कोरोना बाहेकका सेवा बहिष्कार गर्ने चिकित्सक संघको घोषणा

२४ असोज, काठमाडौं । अनसनरत डा. गोविन्द केसीको स्वास्थ्य अवस्था जटिल हुँदा पनि सरकार वार्ताबाट पन्छिएपछि नेपाल चिकित्सक संघ कडा रुपमा आन्दोलनमा उत्रिएको छ । उसले भोलि आइतबारदेखि देशभरका सबै अस्पतालमा कोरोना र आकस्मिक बाहेकका सेवा बहिष्कार गर्ने घोषणा गरेको छ ।

२७ दिनदेखि आमरण अनसनरत डा. केसीको जीवन रक्षाका निम्ति सरकार गम्भीर नभएको भन्दै संघले आइतबार आकस्मिक र कोरोना बाहेकका सम्पूर्ण सेवा बहिस्कार गर्ने निर्णय गरेको हो । २५ गतेसम्म सत्याग्रह अन्त्य नभए कडा आन्दोलनका कार्यक्रम गर्ने चिकित्सक संघले यसअघिदेखि नै चेतावनी दिइसकेको थियो ।

यसबीचमा वार्ता थालिएपनि सरकार भने सहमतिबाट भाडिएको छ । उसले सहमति गर्ने भन्दा पनि डा.केसीलाई मृत्युको मुखमा पुर्याएर नेपाली जनतालाई धोका दिएको चिकित्सक संघको दाबी छ । भदौ २९ गतेदेखि डा.केसी ६ बुँदे माग राखेर अनसनमा छन् ।

तर सरकारले २५ दिनपछि वार्ता समिति गठन गरेपनि सहमति चाहेको देखिएको छैन् । बरु डाक्टर र केसीलाई अलमल्याएर थकाउने रणनीति लिएको देखिएकाले चिकित्सक संघले देशव्यापी आन्दोलन अगाडी बढाउने घोषणा गरेको हो ।