ओलीको तारिख खेप्दै प्रचण्ड

२५ असोज, काठमाडौं । सत्तारुढ नेपाल कम्युनिष्ट पार्टीका कार्यकारी अध्यक्ष पुष्पकमल दाहाल प्रचण्डको हिजोआज बालुवाटार धाउनु दैनिकी बनेको छ । कोरोना संक्रमण व्यापक देखिएपछि प्रधानमन्त्री निवास बालुवाटारमा राजनीतिकर्मीको आउजाउ पातलो छ । तर प्रचण्ड भने दिनहुँ तारेख लिने हिसाबमा पुग्छन् ।

एकदुई घण्टा प्रधानमन्त्री केपी ओलीसँग भलाकुसारी गर्छन्, मन्त्रिमण्डल पुनर्गठनको विषयमा गफिन्छन्, तर ओलीलाई कन्भिन्स गर्न चाहिं सक्दैनन् ।  प्रधानमन्त्री ओलीपनि प्रचण्डका कुरा सुन्छन्, तर सहमत हुँदैनन्, चियानास्ता खाएर फेरि अर्काे दिनको तारिख तोक्छन् र छुट्टिन्छन् ।

यही रीत लामो समयदेखि कायमै छ । चूरो कुरो मिलेकै छैन । त्यसैले दुुवै जना संवाद भइरहेको सन्देश दिन मात्रै तारिख लिनेदिने गरिरहेका छन् ।  ओली चाहन्छन्– अहिलेका धेरैजसो मन्त्री कायमै रहुन्, तर प्रचण्डको सोच बेग्लै छ । उनी मन्त्रिमण्डल पुनर्गठनको विषयलाई राजनीति गर्ने बलियो हतियारका रुपमा प्रयोग गर्न चाहन्छन् ।

त्यसैले प्रधानमन्त्रीबाहेक सबै मन्त्री फिर्ता बोलाउने उनको सोच छ । खासगरी उनी पूर्व माओवादी पक्षबाट मन्त्री बनेका दुुईजना रामबहादुर थापा र लेखराज भट्टलाई सबक सिकाउन चाहन्छन् ।  प्रधानमन्त्री ओलीसँगको विवादमा दुवजनाले प्रचण्डलाई खुलेर साथ दिएनन् । अझ भट्टले त प्रचण्डको विरोध नै गरे । त्यसैले उनीहरुको ठाउँमा नयाँ मान्छे पठाउने प्रचण्डको चाहना छ । तर प्रधानमन्त्री ओली भने त्यहीं राजनीति गर्न खोज्दैछन् ।

प्रचण्डलाई कमजोर बनाउने यी दुव पात्र ओलीका प्रिय भएका छन् । त्यसैले थापा र भट्टलाई निन्तरता दिन ओली कस्सिएका छन् । ओलीले यस्तो प्रस्ताव गर्दा प्रचण्डले उनीहरुलाई आफ्नै कोटाबाट राख्नसमेत भनेका थिए ।  यस्तै सानातिना कुरामा अल्मिलिएकाले पुनर्गठन हुन ढिलाई भएको हो – स्रोतले भन्यो ।

पार्टी उपाध्यक्ष बामदेव गौतमको विषय पनि विवादको अर्काे कारण हो । बामदेवलाई राष्ट्रियसभा सदस्य बनाएपछि अब अर्थमन्त्री बनाउने चाहना प्रचण्डको रहेको छ । गौतम स्वयं पनि यसका लागि लालयित छन् । उनले ओलीसँग मुखै फोरेर आफूलाई अर्थमन्त्री बनाउन आग्रह गरिसकेको अवस्था छ ।

तर ओली भने गौतमलाई अर्थमन्त्री बनाउने पक्षमा छैनन् । अरु नै मन्त्रालय दिएर गौतमलाई मनाउने उनको प्रयास जारी छ । यसैबीच गौतमको राष्ट्रियसभा सदस्यको वैधानिकताकै विषयलाई लिएर सर्वाेच्च अदालतमा अहिले मुद्धा विचाराधिन अवस्थामा छ ।  मुद्धा लामै समय लम्बिने देखिएको छ । यसैबीचमा मन्त्रिमण्डल पुनर्गठन गर्न ओली हतारिएका थिए । तर प्रचण्डले हलो अड्काई दिएका छन् । गौतमको विषयमा सर्वाेच्चले अन्तिम निरुपण नगरेसम्म पुनर्गठन नगर्न ओलीलाई आग्रह गरेका छन् ।

प्रचण्डकै कारण पुनर्गठनको विषयले तीब्रता पाएको छैन – बालुवाटार निकट स्रोत भन्छ– गौतमप्रतिको वफादारी भन्दा पूर्व एमालेभित्र खेल्ने नियत प्रचण्डको देखियो । प्रधानमन्त्री ओली भने अहिले रिक्त तीनवटा मन्त्रालयमा पूर्ति गर्ने तयारी छन् । यो सन्दर्भमा उनले प्रचण्डसँग कुरा गरिसकेका छन् । दुवै अध्यक्ष सहमत भएपनि मन्त्रालय बाँडफाँडको विषयमा मतभेद देखिएको छ ।

हाल रिक्त अर्थ, सञ्चार र शहरी विकास मन्त्रालयमा पूर्ति गर्दा एउटा महत्वपूर्ण मन्त्रालय पूर्व माओवादी पक्षलाई दिन प्रचण्डले जोड गरेका छन् । या त अर्थ नभए सञ्चार मन्त्रालय पूर्व माओवादी पक्षलाई दिइनुपर्ने उनको माग थियो । तर ओलीले त्यसमा सहमति जनाएनन् । उनले शहरी विकास मन्त्रालय मात्र हाललाई दिन सकिने बताए । ओलीको अडानमा प्रचण्ड सहमत नहुँदा यो काम समेत प्रभावित भएको छ ।

प्रचण्डले हाललाई सञ्चार मन्त्रालय पूर्व माओवादी पक्षलाई दिन ओलीसँग आग्रह गरेका छन् । उक्त मन्त्रालयमा अहिले जनार्दन शर्मालाई पठाउने उनको तयारी छ । तर ओली भने अर्थमा पार्टी महासचिव विष्णु पौडेल र सञ्चारमा महेश बस्नेतलाई ल्याउन चाहन्छन् । शर्मालाई अहिले शहरी विकास दिएर पछि पुनर्गठनका बेला अरुमा मिलाउने आश्वासन ओलीले दिएका थिए । ओलीको प्रस्तावमा प्रचण्डले सहमति जनाएनन् ।

सहमति नजनाउनुको मूलकारण भनेको अर्थ मन्त्रालयमा गौतमलाई ल्याउनु नै हो – बालुवाटार निकट स्रोत भन्छ । प्रधानमन्त्रीलाई कमजोर बनाउन गौतमलाई जसरी भएपनि अर्थमन्त्री बनाउने दाउमा प्रचण्ड रहेको पनि स्रोतको भनाई छ । सो प्रस्तावमा शीर्ष नेताहरु झलनाथ खनाल र माधवकुमार नेपालको समेत साथ र समर्थन देखिन्छ ।  त्यसैले गर्दा प्रचण्ड आफैं ओलीको नयाँ नयाँ तारिख खेप्न इच्छुक देखिएका हुन् – स्रोतको भनाई छ ।