बजारमा कुखुराको मासुको मूल्य ओरालो, उपभोग निरासाजनक !

२५ असोज, काठमाडौं । काठमाडौं उपत्यकामा कुखुराको मासुको मूल्य ओरालो लागेको छ । बजारमा कुखुराको मासु पछिल्लो तीन वर्षयताकै सस्तो भएको हाे । कोरोना माहामारीका कारण एक महिनामा तीन पटक मूल्य घट्दा पनि मासु नबिकेपछि प्रतिकिलो तयारी मासुको मूल्य दुई सय रुपैयाँबाट पनि तल झरेको छ ।

राष्ट्रिय कुखुरा बिक्री व्यवसायी संघका अनुसार मासुको मूल्य तीन वर्ष यताकै सस्तो छ तर दुई सय भन्दा कममा बेच्दा पनि बजारमा मासुको खपत जस्ताको तेस्तै छ । यो साताका लागि मात्र संघले काठमाडौं उपत्यकामा कुखुराको तयारी मासुको प्रतिकिलो न्यूनतम् मूल्य २०५ रुपैयाँ तोकेको छ । साउन अन्तिम साता तीन सय भन्दा बढी रहेको मासुको मूल्य तीन पटक घटेर नयाँ मूल्य कायम भएको हो । मूल्य सस्तो हुँदा पनि उपभोग भने अझै निरासाजनक रहेको छ

चाडपर्वलाई लक्षित गरेर किसानले मासुको उत्पादन बढाएको तर बजारको खपत ५० प्रतिशतभन्दा बढीले घट्दा मासुको बिक्रीमा मन्दी आएको छ । मासु धेरै खपत हुने होटल, रेष्टुरेन्ट, पार्टी पयालेस, होटल जस्ता कोभिड-१९ले बन्द हुँदा मासुको खपत निरासाजनक छ ।

लकडाउन अवधिमा मासुको व्यापार राम्रै भएपनि दोस्रो पटकको निषेधाज्ञाले व्यापार चौपट भएको छ । मासु खपतका लागि सरकारी योजना नभएको र महामारीकै बेला आइपरेको संकटले व्यवसायी पनि अन्योलमा परेका छन । सामान्य अवस्थामा काठमाडौंमा दैनिक साढे दुई लाख किलो मासु बिक्री हुने गरेकोमा अहिले मुस्किलले सवा लाख किलो मात्रै मासु बिक्री भईरहेको संघले जनाएको छ ।