दशैंमा निषेधाज्ञा गर्ने सरकारको संकेत

२५ असोज, काठमाडौं । कोरोना भाइरसको महामारी थप बढ्दै गएपछि निषेधाज्ञा गर्ने संकेत सरकारले दिएको छ । कोरोना महामारी भयावह भइरहेका बेला नागरिकमा सचेतना बढ्नुको साटो लापरबाही बढेको भन्दै सरकारका प्रवक्ता समेत रहेका परराष्ट्रमन्त्री प्रदीप ज्ञवालीले फेरि लकडाउन वा निषेधाज्ञा गर्नुपर्ने अवस्था आउने संकेत गरेका हुन् ।

सरकारले गरेका आग्रहको नागरिक स्तरबाट अवज्ञा भए पुनः लकडाउन हुन सम्भावना रहेको उनले बताए । सरकारले पटक पटक मास्क लगाउन, सामाजिक दुरी कायम गर्नका लागि गरेको आग्रह नागरिकले नमानेको भन्दै मन्त्री ज्ञवालीले यस्तै अवस्थाबाट कोरोना झन अनियन्त्रिततर्फ गएकाले लकडाउन गर्नुपर्ने अवस्था आउने बताएका हुन् ।

अहिलेको अवस्थामा लकडाउन र निषेधाज्ञा गर्ने कुरा सरकारको प्राथमिकतामा नरहेको भन्दै उनले नागरिक संवेदनशील नभए लकडाउन गर्न सरकार बाध्य हुने पनि मन्त्री ज्ञवालीको भनाई छ ।