व्यवसायीसामु झुक्यो सरकार ! गाडीका सबै सिटमा यात्रु राख्न दिने निर्णय

२६ असोज, काठमाडौं । कोरोना महामारीलाई बेवास्ता गर्दै सरकारले सार्वजनिक गाडीका सबै सिटमा यात्रु राख्न दिने निर्णय गरेको छ । सोमबार बसेको मन्त्रिपरिषद बैठकले यसअघि आधा मात्रै यात्रु राख्न दिने निर्णय उल्टाउँदै सबै सिटमा यात्रु राखेर गाडी चलाउन दिने निर्णय गरेको हो ।

खासगरी दशैंँमा घर जानेका लागि सरकारले यो निर्णय गरेको हो । यातायात व्यवसायीले सबै सिटमा यात्रु राख्न नपाए दशैंको अग्रिम टिकट बुकिङ नखोल्ने निर्णय गरेका थिए । व्यवसायीले यस विषयमा अडान लिएपछि सरकार बाध्य भएर आफ्नो निर्णयबाट पछि हटेको हो ।

अब सबै सिटमा यात्रु चढ्न पाउने भएपछि व्यवसायीले यसअघिको भाडा मात्रै लिन पाउनेछन् ।