गृहसचिवको नाममा अनेकधन्दा, प्रहरीलाई मासिक ४० हजार, सिडिओलाई ३०

२७ असोज, काठमाडौं । सिडिओ सरुवामा कुनै सिष्टम नहुँदा यतिबेला गृह प्रशासन अस्तव्यस्त हुन थालेको छ ।  गृह प्रशासनको अनुभव नै नभएका उपसचिव र सहसचिवलाई चलखेलका आधारमा धमाधम सिडिओ बनाएर पठाउन थालिएको छ । यस्तो विकृतिले जिल्लाहरुमा अवैध धन्दा फस्टाउन थालेको छ ।

उदारणका लागि बाग्लुङमा हेर्न सकिन्छ । बाग्लुङमा सिडिओ रहेका गौलोचन सैजुलाई ६ महिनामै हटाएर सुरेश न्यौपानेलाई पठाइएको छ । न्यौपानेले क्षमताका आधारमा होइन, गृहसचिव महेश्वर न्यौपानेको पावरका आधारमा सिडिओ हुने अवसर पाएका हुन् । गृहसचिवका आफन्त भएकाले उनलाई बाग्लुङमा पठाइएको बताइएको छ ।

बाग्लुङमा सिडिओ भएर गएका न्यौपानेले महामारीको बेलामा पनि कमाउनमै ध्यान केन्द्रीत गरेको स्रोत बताउँछ । कतिसम्म भने प्राकृतिक विपद्लाई समेत उनले कमाउने अवसर बनाएको आरोप उनीमाथि लागेको छ ।

समाचार स्रोतले दिएको जानकारी अनुसार गत १० साउनमा बाग्लुङ नगरपालिकाको वडा नम्बर १ निरहुघाटमा सुख्खा पहिरो गएको थियो ।जुन पहिरो हटाउने क्रममा जेसीबीका चालकहरु पुरिएका थिए । जसमध्ये रोशन नेपालीको मृत्यु भएको थियो भने, राजु माझी घाइते भए । अर्का कामदार नेत्रबहादुर पुन हालसम्म बेपत्ता छन् ।

स्रोतका अुनसार पहिरो हटाउने नाममा ठेकदार विमलेश आचार्यले गिटी उत्खनन गरेका थिए । लाइसेन्स नै नभएका चालक राजु माझीलाई जेसिबी चलाउन दिइएको थियो । सिडिओ न्यौपाने, मेयर जनकराज पौडेल तथा वन उपभोक्ता समितिका पदाधिकारीको मिलेमतोमा त्यसरी उत्खनन गर्दा दुर्घटना भएको थियो । यसले जिल्लामा कुन हदसम्म बेथिती बढेको छ भन्ने प्रष्ट हुन्छ ।

त्यस्तै, प्रहरी र प्रशासनकै मिलेमतोमा जिल्लाको ताराखोला गाउँपालिकामा प्राकृतिक दोहन चलिरहेको छ । जहाँ ४४ वटा ढुंगाखानी सञ्चालन गरिएको छ । जसमध्ये अधिकांश मापदण्ड विपरीत छन् ।

ताराखोला गाउँपालिका वडा नम्बर ५ का हिमाल विक, कलाधर सुवेदी, वडा नम्बर ४ का धनबहादुर खत्रीले सेटिङमा ढुंगाखानी चलाउँदै आएका छन् । मापदण्ड विपरीत सञ्चालनमा रहेको कमेरेपानीको खानीका कारण धप्लेङका बस्ती जोखिममा रहेको गुनासो स्थानीयले गर्दै आएका छन् । तर, उच्च तहको सेटिङका कारण उत्खनन रोकिएको छैन । राती राती यहाँका ढुंगा पोखरा पु¥याइने गरिएको छ ।

त्यसवापत प्रहरीलाई मासिक ४० हजार, सिडिओलाई ३०, राजश्व कार्यालयलाई २० तथा वन कार्यालयलाई २० हजार रुपैयाँ दिने गरिएको स्रोत बताउँछ । हालै बाग्लुङ पुगेका एसपी लोकेन्द्र श्रेष्ठसँग समेत सो समूहले सेटिङ मिलाइसकेको स्रोत बताउँछ । आफु गृहसचिवको आफन्त भएकाले कसैले केही गर्न नसक्ने भन्दै सिडिओ न्यौपानेले सिधैं डिल गर्ने गरेको आरोप छ ।