कर्णाली विवादबारे ओली–प्रचण्डको कुरो मिलेन !

२८ असोज, काठमाडौं । सत्तारुढ दल नेकपाको सत्तासकस अहिले प्रदेश केन्द्रित देखिएको छ । नेकपाको कर्णाली संसदीय दलमा समस्या देखिएपछि अध्यक्षद्वय केपी शर्मा ओली र पुष्पकमल दाहाल प्रचण्डबीच बुधबार पनि छलफल भयो तर दुई अध्यक्षबीच अढाइ घण्टा लामो संवाद भएपनि कर्णालीमा देखिएको विवादबारे दुई अध्यक्षबीच ठोस् सहमति भने जुट्न सकेन ।

सत्तारुढ नेकपाको केन्द्रमै कुरो नमिलिरहेको समयमा अहिले कर्णाली प्रदेशले सकस पारेको हाे । कर्णाली प्रदेशका पदाधिकारी, प्रदेशका सहइन्चार्ज यामलाल कँडेल, अध्यक्ष गोरखबहादुर बोगटी, सचिव मायाप्रसाद शर्मा, निलम्बन गरिएका मुख्य सचेतक गुलाबजंग शाह, मुख्यमन्त्री महेन्द्रबहादुर शाहीसहित नेताहरू काठमाडौं झिकाइएको छ ।

बिहीबार पनि दुवै अध्यक्ष बसेर पुनः छलफल गर्ने कार्यसूची तय भएको छ । कर्णालीका १८ जना सांसदले मुख्यमन्त्री महेन्द्रबहादुर शाहीविरुद्ध अविश्वास प्रस्ताव दर्ता गराएपछि समस्या चर्किएको हो । उता मुख्यमन्त्री शाहीले पनि कर्णालीका नेकपा प्रमुख सचेतक गुलाबजंग शाहलाई पदमुक्त गरेका छन् ।

उक्त विवादमा ओली भर्सेस पुष्पकमल दाहाल प्रचण्ड, माधव नेपाल, झलनाथ खनाल, नारायणकाजी श्रेष्ठ लगायतका नेताहरु एक ढिक्का भएका छन् ।