भ्रष्टाचारको प्रमाण नदेखाउने बाबुरामविरुद्ध मानहानीको मुद्दा हाल्नुपर्छ : लोहनी

२९ असोज, काठमाडौं । भ्रष्टाचार गरेको प्रमाण छ भन्ने तर प्रमाणित गर्न नसक्ने पूर्वप्रधानमन्त्री बाबुराम भट्टराईविरुद्ध मानहानीको मुद्दा हाल्नुपर्ने राप्रपाका अध्यक्ष डा. प्रकाशचन्द्र लोहनीले बताएका छन् ।

नेपालकै शीर्ष नेता नेकपाका अध्यक्षद्धय केपी शर्मा ओली र प्रचण्ड तथा कांग्रेस सभापति शेरबहादुर देउवाले भ्रष्टाचार गरेको आरोप लागेपछि कि त यो विषयमा थप अनुसन्धान गर्नुपर्ने र नभए बाबुरामविरुद्ध मानहानीको मुद्दा हाल्नुपर्ने लोहनीको तर्क छ ।

‘डा. बाबुरामले नेपालका ठूला नेताहरुलाई भ्रस्टाचारको आरोप लगाउनु गम्भीर कुरो हो । अब यसको उपचारको लागि मानहानीको मुद्दा अदालतमा हाल्ने आट देखाउनु जरुरी छ’ लोहनील्े फेसबुकमा लेख्नै यस्तो भनेका हुन् ।

बुढीगण्डकी आयोजनामा ओली, प्रचण्ड र देउवाले भ्रष्टाचार गरेको र प्रमाण आफसँग रहेको बताएपछि बाबुरामको आलोचना चुलिएको छ । नेकपा र कांग्रेसले बाबुरामको आरोपको खण्डन गर्दै प्रमाण भए देखाउन वा अख्तियारमा बुझाउन पनि चुनौति दिइसकेका छन् । तर त्यसपछि बाबुरामले तार्किक जवाफ दिन सकेका छैनन् ।