अर्को अस्पताल लैजादै गर्दा संक्रमितको बाटैमा ज्यान गयो

२९ असोज, बुटवल । अस्पतालमा बेड नहुँदा एक संक्रमितको बाटैमा ज्यान गएको छ । रूपन्देहीको बुटवलस्थित कोरोना विशेष अस्पतालमा बेड अभाव भई दाङको बेलझुन्डी अस्पताल लैजाँदै गर्दा अर्घाखाँचीको होम्निकास्थान गाउँपालिका–९ का ७३ वर्षीय व्यक्तिको बिहीबार बिहान मृत्यु भएको हो ।

स्वास्थ्यमा समस्या भएपछि प्रादेशिक अस्पताल आएका उनको असोज २७ गते पीसीआर परीक्षण गर्दा रिपोर्ट पोजिटिभ आएको थियो । उनलाई बुधवार धागो कारखानास्थित कोरोना विशेष अस्पतालको आइसोलेसनमा राखिएको थियो ।

बिरामीको स्वास्थ्यमा थप समस्या भई आईसीयू आवश्यक परेपछि दाङको बेलझुन्डी लैजाने क्रममा बाटोमै मृत्यु भएको हो । उनमा श्वासप्रश्वासको समस्या रहेको डाक्टरहरुले बताएका छन् ।