सोमबारदेखि सरकारले सहुलियतमा खसीबोका बिक्री गर्ने

२ कात्तिक, काठमाडौं । सरकारले साेमबारबाट सहुलियतमा खसीबोका बिक्री गर्ने तयारी गरेकाे छ । आइतबार खाद्य व्यवस्था तथा व्यापार कम्पनीको बैठक बसेर सहुलियत बिक्री मूल्य तय गरिने र सम्भव भए खसीबोका भाेलीदेखि बिक्री गर्ने तयारी गरेकाे हाे ।

काेराेना माहामारीका कारण यसवर्ष उपभोक्तामा दशैंको रौनक कम देखिएकाे छ । यस कारण कम्पनीले एक हजार खसीबोका ल्याउने भनिए पनि सबै एकै पटक भने नल्याइने जनाएको छ ।

दशैँका लागी खाद्य व्यवस्था तथा व्यापार कम्पनीले खरिद गरेको २१० वटा खसीबोका आइतबार काठमाडौं आइपुगेको छ । हेटौंडाबाट खरिद गरिएको खसीबोकाको पहिलो लट भखैरै कम्पनीको थापाथली चौरमा ल्याइएको छ ।

हेटौँडा र तुलसीपुरबाट क्रमश थप खसीबोका भित्रिदै छन । कम्पनीले हेटौंडाबाट जिउँदो खसीबोका प्रतिकिलो ५३५ देखि ५५० सम्म र तुलसीपुरबाट ५०० देखि ५८० सम्ममा खरिद गरेर काठमाडौं ल्याएको हो ।

यस्तै कम्पनीले यस वर्ष च्यांग्रा नबेच्ने भएको छ । जिउँदो च्यांग्रा निकै महँगो भएपछि खरिद गर्ने निर्णयबाट कम्पनीपछि हटेको हो । खाद्यले खरिद गर्ने ठाउँमै च्यांग्राको मूल्य गत वर्षभन्दा निकै बढेपछि नकिन्ने निर्णयमा पुगिएको कम्पनीले जनाएकाे छ ।  यस वर्ष काठमाडौंसम्म ढुवानी गर्दा जिउँदो च्यांग्राको मूल्य १००० हाराहारी पुग्ने र च्यांग्रा पनि निकै ठुला-ठुला मात्रै पाइएको कम्पनीले जनाएको छ ।