कांग्रेस नेताको एउटै स्वर ‘दशैंभत्ता दिएर सांसदलाई बदनाम गरायो, सरकार संक्रमित भयो’

३ कात्तिक, काठमाडौं । इतिहासमै बदनाम बन्दै गएको प्रधानमन्त्री केपी शर्मा ओली नेतृत्वको सरकारविरुद्ध कांग्रेस नेताहरुले एकै स्वरमा कडा टिप्पणी गरेका छ्न् । उनीहरुले जनताप्रति उत्तरदायी नभएर सरकारले इतिहासमै गैरजिम्मेवारपन देखाएको पनि बताएका छन् ।

नेपाली कांग्रेसका नेता प्रकाशमान सिंहले दशैंंभत्ता वितरण गरेर सांसदको बदनाम गरेको बताएका छन् । कोरोना महमारीमा जनताको कोरोना पीसीआर परीक्षण र उपचार नगर्ने सरकारले सांसदलाई भत्ता वितरण गरेर बदनाम गर्न खोजेको सांसद सिंहको भनाई छ ।

सोमबार प्रेस विज्ञप्ति सार्वजनिक गर्दै प्रतिनिधिसभा सांसद समेत रहेका नेता सिंहले सांसदहरुको खातामा दशैंभत्ता पठाएर सरकारले सांसदहरुलाई जनताको नजरमा बदनाम गर्ने दुराशय राखेको बताएका हुन् । सरकारको यो घृणित कार्य निन्दनीय भएको पनि उनले बताएका छन् ।

सरकारले बदनाम गर्न खोजेपनि इमान्दारीसँग दशैँभत्ता फिर्ता गर्ने घोषणा नेता सिंहले गरेका छन् । साथै उनले सबै सांसदलाई दशैँभत्ता फिर्ता गर्न पनि आग्रह गरेका छन् । सरकारले जनताको स्वास्थ्य बचाउनुको साटो देशमा अहिलेसम्मकै धेरै भ्रष्टाचार, कमिसन र बेथिती निम्त्याएको पनि नेता सिंहको भनाई छ ।

संक्रमित भएको ओली सरकार

यस्तै कांग्रेस नेता गगन थापाले जनताको पीसीआर परीक्षण नगर्नु सरकार स्वयंम संक्रमित भएको टिप्पणी गरेका छन् । सामाजिक सञ्जाल ट्वीटरमा ट्वीट गर्दै प्रतिनिधिसभा सांसद समेत रहेका थापाले जनताप्रति उत्तरदायी हुन छाडेर सरकारले आफैलाई संक्रमित घोषणा गरेको टिप्पणी गरेका हुन् ।

‘स्वास्थ्य मन्त्रालयको पछिल्लो निर्णय कोरोना संक्रमितले आफ्नो उपचार आफैं गर्नु, यसरी हरेकदिन खुद्राखुद्रामा यस्तो निर्णय गर्नुभन्दा बरु सिधै भनिदिनुस’ थापाले ट्वीटमा लेखेका छन, ‘स्वयं संक्रमित भएर आइसोलेसनमा रहेकोले अब उपरान्त संक्रमितको संख्या गन्ने बाहेक थप केही नगर्ने जानकारी गराइन्छ ।’

यस्तै कांग्रेस नेता धनराज गुरुङले कोरोना संक्रमितले आजदेखि परिक्षण र उपचार खर्च आफैँले ब्यहोर्नु पर्ने सरकारको निर्णय आपत्तिजनक भएको टिप्पणी गरेका छन् । सरकारले गरेको निर्णयको विरोध गर्दैै उनले जनताप्रति यति नालायक भएको सरकार इतिहासकै असफल सरकार भएको टिप्पणी गरेका छन् ।

जनताको टाउकोमा ऋणको भारी बोकाएर सरकार जिम्मेवारीबाट पन्छिनु ठूलो गैरजिम्मेवारीपन भएको पनि उनले बताएका छन् ।