अमेरिकाका नेपालीहरुद्वारा ट्रम्प जिताउ अभियान सुरु

३ कार्तिक, न्युयोर्क । अमेरिकाका नेपालीहरुद्वारा आसन्न अमेरिकी राष्ट्रपति चुनावमा वर्तमान राष्ट्रपति डोनाल्ड ट्रम्पलाई जिताउन अभियान सुरु गरेका छन् । अक्टोवर १८ , २०२० मा सम्पन्न जुम मिटिङमा धेरै नेपालीमुलकाअमेरिकनहरु सहभागी भएका छन् । यसअघि राष्ट्रपति ट्रम्प र उनको पार्टी रिपब्लिकनको पक्षमा नेपालीहरु नखुलेपनि यसपटक भने उनीहरु निर्धक्क ट्रम्प जिताउ अभियानमा लागेका हुन् ।

मिटिङमा सहभागीहरुले राष्ट्रपति ट्रम्पले आफ्नो देश र जनताको लागि कोरोना महामारीका बीच पनि गरेका कामहरुको खुलेर प्रशंसा गरेका थिए । उनीहरुले राष्ट्रपति ट्रम्पले विश्वमा शान्ति कायम गरेको , देशको आर्थिक अवस्थालाई मजबुत बनाएको, विदेश सम्वन्धमा प्रगति गरेको, कोरोनाबाट प्रभावित जनतालाई ठुलो राहत र स्टिमुलस प्याकेज दिन सफल रहेको, ट्याक्स फाइल गर्दा प्रति बच्चाले पाउने ट्याक्स क्रेडिट दुई हजार बनाएको र अमेरिकालाई थप सुरक्षित बनाउन मेक्सिको बोर्डरमा बिशाल वाल लगाउन सुरु गरेको बताएका छन् ।

साथै वैधानिक बाटोबाट अमेरिका आउनेहरुलाई ट्रम्प प्रशासनले स्वागत गरेको , अपराधिक गतिविधिमा संलग्न बाहेक अन्य आप्रवासीप्रति नरम नीति लिएको र बाहिर प्रचार गरिए जस्तो राष्ट्रपति ट्रम्प आप्रवासी बिरोधी नभएकोले कुनै भ्रममा नपर्न र ट्रम्पलाई मत हाल्न नेपाली समुदायलाई आव्हान गरेका छन् ।

सो कार्यक्रममा उनीहरुले अमेरिका र यहाँका जनताको लागि पुर्व राष्ट्रपतिहरु अब्राहम लिङ्कन र रोनाल्ड रेगनको योगदानको अध्ययन गर्न र राष्ट्रपति ट्रम्प उनीहरुकै लिगेसी भएको प्रस्ट पारिएको छ । उक्त कार्यक्रममा सफल व्यवसायी एवम समाजसेवी रबिन बज्राचार्य, ओम भट्टराई , सीपी पौडेल , ईन्द्र सिटौला, भक्त भण्डारी, रतन झा, देवी डेभिड आचार्य, नवराज खड्का, सुमन वस्ती , विनोदकुमार तिवारी , हिराकुमार श्रेष्ठ, सागर तिमल्सिना, ज्योति कँडेल, विशाल शाह लगायत धेरैको सहभागिता थियो ।

कार्यक्रममा निकट भविष्यमा फेरी व्यापक रुपमा आमनेपाली समुदायलाई सामेल गरेर अर्को जुम मिटिङ गर्ने बताइएको छ ।