लागतका आधारमा दुधको मुल्य नपाएकाे दुग्ध उत्पादक कृषकहरुको गुनासो

३ कात्तिक, वालिङ । वालिङ नगरपालिका भित्रका दुग्ध उत्पादक कृषकहरुले लागतका आधारमा दुधको मुल्य नपाएको गुनाशो गरेका छन् । उनीहरुको एउटै गुनासाे छ, लागतका आधारमा दुधको मुल्य कम भयो । नगर भित्रका दुग्ध उत्पादक कृषकहरुका लागि आयोजना गरिएको दुग्ध उत्पादन तथा प्रशोधन सम्वन्धी तालिमका सहभागीहरुले दुधको उचित मुल्य नपाएको गुनासाे गरेका हुन् ।

तालिमपछि आयोजित अन्तक्रियामा बोल्दै वालिङ दुग्ध उत्पादन समितिका सचिव टिकाराम रेग्मीले पहाडी क्षेत्रमा लागत धेरै पर्ने र सोही अनुशार मुल्य कायम हुनु पर्ने धारणा राखे । उत्पादनका आधारमा अनुदान रकम दिने व्यवस्था गर्नुपर्नेमा सचिव रेग्मीको जोड छ ।

उनले थप्नु भयो छिमेकी मुलुकहरु भारत र चीनमा कृषकहरुलाई राज्यले गर्ने व्यवहार नेपालमा पनि अनुशरण गर्नु जरुरी छ । कार्यक्रमका सहभागीहरुले राज्यले कृषकलाई गर्ने व्यवहारमा परिवर्तन आउन जरुरी रहेको बताएका थिए ।  कार्यक्रमा बोल्दै दियालो संस्थाका अध्यक्ष कविता तिवारीले कृषक तथा उद्यमीहरुको हितका लागि वालिङमा कार्यक्रम शुरु गरिएको जानकारी दिए । उनले भने कोभिड १९ को प्रभाव कम गर्दै उत्पादन बढाउन तर्फ आफूहरुको ध्यान केन्द्रित भएको छ ।

युएनडिपी नेपाल र वालिङ नगरपालिकाको आर्थिक सहयोग तथा दियालो संस्थाको व्यवस्थापनमा सञ्चालित “कोभिड १९ उद्धार र सामाजिक आर्थिक प्रतिकार्य परियोजना” अन्तर्गत नगर भित्रका दुग्ध उत्पादक कृषकहरुका लागि तालिमको आयोजना गरिएको कार्यक्रम प्रमुख राधाकृष्ण डुम्रेले जानकारी दिए ।  तालिमका वालिङ नगरपालिका पशु सेवा शाखाका प्रमुख देब कुमारी श्रेष्ठ र डोलराज गैह्रेले प्रशिक्षण दिए ।