कांग्रेसको विरोधपछि दशैंँ भत्ता कोरोना कोषमा जम्मा गर्ने नेकपाको निर्णय

३ असोज, काठमाडौं । प्रमुख प्रतिपक्षी दल नेपाली कांग्रेसले चर्को विरोध गरेपछि सत्तारुढ नेकपाका सांसदहरुले दसैँ भत्ता कोरोना कोषमा जम्मा गर्ने निर्णय गरेका छन् । प्रतिनिधिसभा संसदीय दलका नेता रहेका प्रधानमन्त्री केपी शर्मा ओलीसहित दुवै सदनका संसदीय दलका नेता र सचेतकहरुको बैठकले चौतर्फी विरोध भएपछि भत्ता नलिने निर्णय गरेको छ ।

नेकपा संसदीय दलका उपनेता सुवास नेम्वाङले सांसदहरुको भत्ता कोरोना कोषमा जम्मा गरिने बताएका छन् । सांसदहरुले दसैँ भत्ता बुझेपछि तीव्र आलोचना भएको थियो । विरोधपछि भीम रावल, नारायणकाजी श्रेष्ठ लगायत नेकपाकै सांसदले विरोध गर्दै भत्ता फिर्ता गर्ने घोषणा थालेपछि नेकपाले भत्ता फिर्ता गरेको हो । कांग्रेसले यसअघि नै दशैँ भत्ता नलिने र कोरोना कोषमा जम्मा गर्ने निर्णय गरिसकेको छ ।