घाटी रेटेपछि असईलाई किनारामा फालियो, जवानलाई नदीभित्र खाल्डो खनेर गाडियो !

४ कार्तिक, धनगढी । शनिबार राती खाना खादैँ गर्दा कैलालीको जुगेडा अस्थायी प्रहरी चौकीमा सुचना आयो, ‘चारदेखि पाँच वटा गोरुगाडामा राखेर चिनियाँ मटर भारततर्फ तस्करी भइरहेको छ ।’ पछिल्ला केही दिनमा मात्रै जुगेडा प्रहरी चोकीले चारवटा डलप (गोरुगाडा) मा लोड गरेर भारत लैजान लागिएको मटर लगायतको अवैध सामान बरामद गरेको थियो ।

यही कामले जुगेडाका असई गोविन्द विश्वकर्मा तस्करका लागि पेस्तोल बोकेर ढाल बनेर उभिएका थिए । उनी जुगेडामा आईसकेपछि तस्करको टाउको दुखाई मात्रै होइन, दैनिक व्यापार नै डामाडोल बनेको थियो । अस्थायी प्रहरी चौकी जुगेडामा गोविन्दले कमाण्ड सम्हालेपछि प्रहरी जवान पनि जिम्मेवार बनेर आफ्नो ड्युटी निभाईरहेका थिए ।

पछिल्लो ६ महिनायता जुगेडामा खटिएका असई गोविन्दले अवैध समान धमाधम बरामद गर्न थालेपछि तस्कर तर्सिएका थिए । उनीहरुले गोविन्दलाई सरुवा गर्न सक्ने ठाउँ थिएन, विकल्प कि हत्या थियो कि त आँखा छल्ने । तर तिक्ष्ण स्वभाव र चनाखो भएर काम गर्ने उनको बानीले गर्दा तस्करलाई आँखा छल्न पनि सहज भएन ।

कोरोना भाइरसको लकडाउनका कारण सीमानाका बन्द भएपछि जुगेडाबाट मात्रै तस्करले तस्करी धन्दा चलाएका थिए । अब त्यो पनि सुक्ने अवस्था आईदियो । यस्तै तस्करहरुको बीचमा नै असई गोविन्द विश्वकर्माको हत्या गर्ने योजना बनेको थियो ।

कसरी भयो हत्या ?

शनिबार रातीको खाना नखाईसक्दै असई गोविन्दलाई विशेष स्रोतबाट सुचना आयो, ठूलो परिणाममा मटर लगायतका अवैध सामान तस्करी हुदैछ । हतार हतार खाना खाएर गोविन्द बाईकमा जवानलाई हालेर नेपाल भारत सीमानामा पर्ने मोहना नदीतिर लागे ।

जहाँ तस्कर त्यसअघि नै विशेष तयारीका साथ बसिरहेका थिए । सामान तस्करी गर्ने र त्यसबीचमा प्रहरी आएपनि घेरा हालेर मार्ने योजना तस्करको थियो । सामान लैजादै गर्दा प्रहरी बाईकमा आईपुगे । रातीको समय भएकाले लुकेर बसेका तस्करहरुले सहजै रुपमा फेला पारे ।

उसो त असई गोविन्द विश्वकर्मा र जवान रामबहादुर सावद पनि तस्करलाई लुकेर उनीहरुको धन्दा चौपट पार्ने योजनामा थिए । तर प्रहरीको योजना सफल हुन पाएन । तत्कालै दर्जन बढी तस्करको घेराबन्दीमा परेका दुई प्रहरी समातिए ।

समातिएपनि उनीहरुको विभत्स रुपमा हत्या भयो । कुटेर मार्दा होहल्ला हुने डरले तस्करले दुवै जनाको घाँटी रेटेर हत्या गरेका थिए । मुखमा कपडा कोचेर उनीहरुले घाँटी रेटेका थिए । घाँटी रेटेपछि असईको शव मोहना नदीको किनारामा फालियो ।

उनीहरु असईको हत्या गरेर अरु प्रहरीलाई तर्साउन चाहन्थे । ताकि कसैले तस्करसँग जोरी खोज्ने दुस्सासह नगरोस । असईको विभत्स हत्या गरेको अवस्थामा शव भेटिएपनि जवान सावद भने बेपत्ता थिए । सावदलाई कसैले पनि भेट्टाउन नसक्ने गरी उनीहरुले हत्या गरेर बेपत्ता पारेका थिए ।

तर केही प्रहरीसँग तस्करको नामसहित जानकारी रहेपछि उनीहरुलाई तत्कालै पक्राउ गरेर अनुसन्धान थालियो । शुरुमा पक्राउ परेका ११ जनापछि थप दुई जनालाई पनि प्रहरीले नियन्त्रणमा लिएर अनुसन्धान शुरु गर्यो ।

केरकार गरेपछि तस्करहरुले नै रहस्य खोले, जवान सावदलाई हत्या गरेर मोहना नदीको बीच भागमा खाल्डो खनेर गाडिएको थियो । घुडासम्म पानी आउने नदीको बीच भागमा फरुवाले खाल्डो खनेर शव हालेपछि ढुंगा हालेर पुरिएको थियो ।

ताकि महिनौसम्म बेपत्ता सावदबारे कुनै कुरा पत्ता नलागोस । तर प्रहरीको अनुसन्धानले तस्करको गोप्य योजना गोप्य रहन सकेन । अन्ततः प्रहरीले तस्करलाई नै सोही ठाउँमा लिएर शव गाडिएको ठाउँ देखाउन भनेपछि उनीहरुले हत्या गरेकोदेखि शव गाडिएको ठाउँको बारेमा विस्तृत बयान दिएका थिए ।

त्यसपछि प्रहरीले बेपत्ता रहेका प्रहरी जवान सावदको शव मोहना नदीको बीच भागबाट उत्खनन गरेर निकाल्यो । याे सबै हेर्दा कुनै दक्षिण भारतीय चलचित्रको कथाभन्दा कम छैन् । यति क्रुर ढंगबाट प्रहरीको हत्या गर्ने तस्करलाई कडा कारवाही गर्न पीडित प्रहरीका परिवारले माग गरेका छन् ।

यो पनि पढ्नुहोस

असईको घाटी रेट्ने तस्कर कि प्रहरी जवान ?

असई हत्या प्रकरणमा ११ जना पक्राउ

असई हत्याको विरोधमा जिल्ला प्रहरी कार्यालय घेराउ

असईको हत्या भएकै ठाउँमा भेटियो बेपत्ता प्रहरी जवानको शव