साइबर एलायन्स फर म्यूचल प्रोग्रेसको सदस्यमा नेपालको सेन्टर फर साइबर सेक्यूरिटी रिसर्च एण्ड इनोभेसन

४ कात्तिक, काठमाडौं । साइबर एलायन्स फर म्यूचल प्रोग्रेस ‘क्याम्प’ को पाँचौँ वार्षिक बैठकबाट नेपालको प्रतिनिधित्व गर्दै सेन्टर फर साइबर सेक्यूरिटी रिसर्च एण्ड इनोभेसन सदस्यमा निर्वाचित भएको छ । क्याम्पको मुख्यालय सोल, दक्षिण कोरियामा सेप्टेम्बर १४-२०, २०२० मा आयोजना भएको साइबर एलायन्स फर म्यूचल प्रोग्रेस ‘क्याम्प’ को पाँचौँ वार्षिक बैठकबाट सीएसराआई सदस्यमा निर्वाचित भएको हो।

साइबर एलायन्स फर म्यूचल प्रोग्रेस ‘क्याम्प’ले अक्टोबर, २०२० को आफ्नो आधिकारिक क्याम्प न्यूजलेटर नं. १९ सार्वजनिक गर्दै सीएसराआई सदस्यमा निर्वाचित भएको जानकारी दिएको हो । सो आधिकारिक क्याम्प न्यूजलेटरमा उल्लेख भए अनुसार सेन्टर फर साइबर सेक्यूरिटी रिसर्च एण्ड इनोभेसन नेपाललाई नयाँ सदस्यमा स्वागत गरिएको छ ।

यसअघि नेपालका तर्फबाट नेपाल सरकारका निकायहरु राष्ट्रिय सूचना प्रविधि केन्द्र र राष्ट्रिय अनुसन्धान विभाग मात्र सदस्य रहेका थिए । साइबर एलायन्स फर म्यूचल प्रोग्रेस ‘क्याम्प’को सदस्यमा हाल ४६ वटा देशहरुको ६० वटा सरकारी, सार्वजनिक निकाय तथा मूनाफा रहित संगठित संस्थाहरु सदस्य रहेका छन् ।

उक्त पाँचौं वार्षिक बैठकमा सीएसराआईका उपाध्यक्ष मिलन राज नेपालीले अन्तर्राष्ट्रिय पर्यवेक्षक तथा सदस्य प्राप्तका लागि सीएसराआईको तर्फबाट नेतृत्व गरेका थिए ।

साथै, उक्त कार्यका लागि सीएसराआईका अध्यक्ष प्रा.डा. सुवर्ण शाक्य, निवर्तमान अध्यक्ष चिरञ्जीवी अधिकारी, र महासचिव ई.शालीग्राम पराजुलीले समेत विशेष प्रतिनिधित्व गरेको सेन्टर फर साइबर सेक्यूरिटी रिसर्च एण्ड इनोभेसनका महासचिव शालिग्राम पराजुलीले बताए ।