कर्णालीमा ओली र प्रचण्डको पनि विवाद !

४ कात्तिक, काठमाडौं । मुख्यमन्त्री महेन्द्रबहादुर शाहीको कार्यशैलीका कारण विवाद चुलिएपछि बालुवाटार आईपुगेको कर्णाली विवाद थप चर्किएको छ । कर्णाली प्रदेश सरकारको विवाद समाधान गर्न पछिल्लो एक हप्तायता नेकपाका अध्यक्ष ओली र प्रचण्डबीच लगातार छलफल भइरहेपनि समाधान निस्कन सकेको छैन् ।

ओली र प्रचण्डबीच मंगलबार पनि छलफल भएको थियो । मुख्यमन्त्री महेन्द्रबहादुर शाहीविरुद्ध संसदीय दलमा अविश्वास प्रस्ताव दर्ता भएपछि विवाद चुलिएको छ । पार्टीभित्रैबाट विवाद चुलिएपछि प्रचण्ड आफ्नो पूरानो सहमति जोगाउन ओलीसँग वार्ता गरिरहेका छन् ।

तर पनि वार्तामा सहमति जुट्न सकेको छैन् । ओलीले विवाद केन्द्रमै मिलाउन दबाब दिँदा प्रचण्ड भने विवाद प्रदेशमै मिलाउनुपर्ने जोडबलमा छ्न । सोही कारण कुरा नमिल्दा कर्णालीबाट काठमाडौं आएका कर्णालीका नेकपाका नेताहरु अन्यौलमा परेका छन् ।

असोज २५ गते मुख्यमन्त्री शाहीविरुद्ध यामलाल कँडेलको नेतृत्वमा १८ जना सांसदको हस्ताक्षरसहित अविश्वास प्रस्ताव दर्ता भएपनि पार लागेको छैन् । अविश्वासको प्रस्ताव फिर्ता नभएपछि कर्णालीको विवादले केन्द्रलाई समेत विवादमा तानेको छ ।