प्रहरी असई र जवानको घाटी रेटेर हत्या गर्ने ७ जना तस्कर सार्वजनिक

४ कात्तिक, काठमाडौं । कैलालीको अस्थायी प्रहरी चौकी जुगेडाका असई गोविन्द विश्वकर्मा र प्रहरी जवान रामबहादुर सावदको घाटी रेटेर हत्या गर्ने ७ जनालाई प्रहरीले सार्वजनिक गरेको छ । जुगेडाका इञ्चार्ज प्रहरी सहायक निरीक्षक असई गोविन्द विश्वकर्मा र जवान रामबहादुर साउदको हत्या गर्ने ७ जना युवा तस्करलाई प्रहरीले सार्वजनिक गरेको हो ।

प्रहरीको हत्या गर्नेमा धनगढी–१० का ३१ वर्षीय रोहित राना, २० वर्षीय राजेन्द्र राना, ३० वर्षीय सुरेश राना, २५ वर्षीय राजकुमार राना, २२ वर्षीय रामनिवास राना, २९ वर्षीय टल्लु भन्ने दलराम राना र २५ वर्षीय राम गोपाल राना हुन् ।

उनीहरुलाई भारतीय सीमा क्षेत्रबाट प्रहरीले पक्राउ गरेको थियो । शुरुमा १३ जना पक्राउ परेपनि हत्यामा संलग्न ७ जनालाई प्रहरीले सार्वजनिक गरेको हो । उनीहरुले असई गोविन्द र जवान सावदलाई हत्या गरेर मोहना नदीको किनारा र बीच नदीमा खाल्डो खनेर शव पुरेका थिए ।