तरुण दलको प्रश्न – रोग, भोक र अभावमा नचाहिने सरकार किन नफाल्ने ?

५ कार्तिक, काठमाडौं । कोरोना महामारीको बेला पनि जनताको सेवाबाट पन्छिने सरकार किन नफाल्ने भन्दै नेपाल तरुण दलले प्रश्न गरेको छ । तरुण दलका अध्यक्ष जितजंग बस्नेतले प्रेस विज्ञप्ती निकाल्दै कोरोना महामारीजस्तो प्रकोपको बेला समेत जनताको सेवा गर्ने भावबाट पन्छिने सरकार अब राख्नुको औचित्य नभएको बताएका छन् ।

‘यस्तो महामारीको बेलामा सरकारले जनता प्रति निर्बाह गर्नुपर्ने समान्य भन्दा समान्य जिम्मेवारीबाट पनि पन्छिदै गएको छ’ तरुण दलका अध्यक्ष बस्नेतले जारी गरेको विज्ञप्तीमा भनिएको छ, ‘महामारीको बेला परिक्षण र उपचारको दायरा बढाउदै लैजानुपर्ने समयमा सरकार ठिक बिपरित परिक्षण, उपचार र लास ब्यबस्थापन जनता स्वयमले गर्नुपर्ने निर्णयमा पुगेको छ यस्तो निर्णय अत्यन्तै खेदजनक छ ।’

सरकारको यो निर्णय संविधानमा उल्लेखित आधारभूत स्वास्थ्य सेवालाई निःशुल्क, जनस्वास्थ्य ऐन २०७५ र सर्वोच्च अदालतको आदेश विपरित रहेको पनि तरुण दलकोे भनाई छ ।

‘आम जनताको अभिभावकको भुमिका निर्बाह गर्नुपर्ने सरकारले यस्ता गैरकानुनी, संविधान विरोधी र अदालतको अपहेलना लगायतका अलोकतान्त्रिक कार्यबाट पछि हट्दै सम्पुर्ण जनताको निःशुल्क परिक्षण र उपचार गर्नका लागि आग्रह गर्दछौ’ विज्ञप्तीमा भनिएको छ, ‘रोग भोक र अभावमा जनताको साथमा नहुने सरकार आवश्यक भैरहन्छन र ?’