बालुवाटार प्रवेश गरे ‘रअ’का प्रमुख गोयल !

४ कार्तिक, काठमाडौं । भारतीय सेना प्रमुखको आसन्न भ्रमणको सुरक्षाअवस्था बुझ्न नेपाल आएका भारतीय जासुसी संस्था ‘रिसर्च एण्ड एनालाईसीस’ रअका प्रमुख सामन्त गोयल बालुवाटार प्रवेश गरेका छन् ।

दिउँसो एयर इण्डियाको विशेष विमानमा काठमाडौं उत्रिएका गोयल राती बालुवाटार छिरेका हुन् । ९ सदस्यीय विशेष टोलीसहित काठमाडौं उत्रिएका रअ प्रमुख गोयलले बालुवाटारमा प्रधानमन्त्री केपी शर्मा ओलीसँग भेटवार्ता गरिरहेका छन् ।

त्यसअघि उनले दिउँसो अरु भीआईपीसँग पनि छलफल तथा भेटवार्ता गरेका थिए । रअका प्रमुखको नेपाल भ्रमणबारे कुनै औपचारिक जानकारी नभएपनि उनले सीमा विवादबारे विभिन्न दलका नेताहरुसंग छलफल गर्ने कार्यक्रम छ ।

भारतीय सेनाध्यक्ष मनोज मुकुन्द नरवाणे कात्तिक तेस्रो साता नेपाल आउने तयारी गरिरहेका बेला ’रअ’को विशेष टोली काठमाण्डु अवतरण गरेको हो । उनको भ्रमण दुई देशको सम्बन्ध सुमधुर गर्नेमा केन्द्रित हुने बताइएको छ ।

भारतीय सेनाध्यक्ष नरवाणेले यसअघि लिम्पियाधुराको नेपाली भूमि सरकारले संविधान संशोधन गरेर नयाँ नक्सा सार्वजनिक गर्दा विवादास्पद अभिव्यक्ति दिएका थिए । उनको अभिव्यक्तिको चर्को आलोचना समेत भएको थियो । सोही कारण उनको आसन्न भ्रमणमा कुनै समस्या नरहोस भनेर सम्भावित सुरक्षा अवस्थाको निरीक्षण गर्न गोयल काठमाडौं उत्रिएका हुन् । यसअघि ओली सरकार गठन हुनेवित्तिकै गोयल नेपाल आएर उच्च भेटवार्ता गरेका थिए ।