इरानले मतदाताहरूलाई तर्साउने गरी इमेल पठायाे

६ कार्तिक, काठमाडौं । अमेरिकी राष्ट्रिय सुरक्षा अधिकारीहरूले डेमोक्र्याटिक मतदाताहरूलाई तर्साउने गरी इमेल पठाउने काममा इरान जिम्मेवार रहेको बताएका छन् । पछिल्लो केही समयदेखि डेमोक्र्याटिक मतदाताहरुलाई धम्कीपूर्ण इमेल आउने गरेको थियो । ती इमेलमा राष्ट्रपति चुनावमा जो बाइडेन नभई डोनाल्ड ट्रम्पको पक्षमा मतदान गर्न भनिएको थियो ।

ती इमेलहरु ट्रम्प समर्थक दक्षिणपन्थी समूहबाट आएको खुलेको अमेरिकाका नेशनल इन्टिलिजेन्स डिरेक्टर जोन ¥याट्क्लिफले बताएको अन्तर्राष्ट्रिय सञ्चारमाध्यमले उल्लेख गरेका छन् ।

संघीय अनुसन्धान व्युरो ‘एफबीआई’ ले गरेको अनुसन्धानमा इरान र रुसले अमेरिकी मतदाताको जानकारी प्राप्त गरेको पनि खुलेको डिरेक्टर जोनले बताएका छन् । अमेरिकामा १३ दिनपछि राष्ट्रपति चुनाव हुँदैछ । रिपब्लिकन राष्ट्रपति डोनाल्ड ट्रम्पलाई डेमोक्र्याटिक उम्मेदवार जो बाइडेनले चुनौति दिँदैछन् ।

विदेशी शक्तिले मतदानमा दखल दिने प्रयास गरेको तथा गलत सूचनाहरु प्रसारित गरेको सम्बन्धमा उत्पन्न चासोलाई लिएर भएको अनुसन्धानको क्रममा इरान र रुससँग मतदाता सम्बन्धी जानकारी रहेको खुलेको हो । इरान र रुसले ट्रम्पको पक्षमा प्रयास गर्दै आएको आरोप लाग्ने गरेको छ ।

इरानबाट डेमोक्र्याटिक मतदातालाई आएको इमेल प्राउड बोइजबाट गएको खुलेको डिरेक्टर जोनले बताएका छन् । प्राउड बोइज ट्रम्पका समर्थकहरुको सम्पूर्ण रुपमा पुरुषहरु मात्रै रहेको दक्षिण पन्थी समूह हो ।

अमेरिकी प्रजातन्त्रमाथिको विश्वासलाई कमजोर बनाउनका लागि मतदाताहरुको जानकारी गलत सूचना फैलाउन प्रयोग भएको वा हुनसक्ने जोनको भनाई छ । तर अधिकारीहरुले इरान तथा रुसले कसरी अमेरिकी मतदाता सम्बन्धी जानकारी प्राप्त गरे भन्ने बारे केही खुलाएका छैनन् ।