यो वर्ष कांग्रेसले चियापान नगर्ने

६ कार्तिक, काठमाडौं । नेपाली कांग्रेसले विगत चार दसक भन्दा अगाडिदेखि थालिएको चियापान कार्यक्रम यो वर्ष नगर्ने भएको छ । २०३४ सालदेखि राष्ट्रिय मेलमिलाप कार्यक्रमका रुपमा बीपी कोइरालाले थालेको चियापान कार्यक्रम यो वर्ष कोरोना कहरले गर्दा नगर्ने निर्णय पार्टीले गरेको छ ।

हरेक वर्ष कोजाग्रत पूर्णिमाका दिन गरिने चियापान यसपाला नगर्ने जानकारी कांग्रेस प्रवक्ता विश्वप्रकाश शर्माले दिए । ०३३ साल पुस महिनामा नेपाली कांग्रेसका संस्थापक नेता कोइराला भारतको निर्वासन त्यागी स्वदेश फर्किएका थिए ।  त्यसको लगत्तै अर्काे वर्षबाट कांग्रेसले हरेक वर्षको कोजाग्रत पूर्णिमाका दिन चियापान गर्दै आएको छ ।

पञ्चायतको क्रुर शासन कालमा समेत कार्यक्रम हुने गरेको थियो । हरेक वर्ष गरिने यस्तो कार्यक्रममा राजनीतिक जमघट हुने गरेको थियो । यसअघि पार्टी सभापतिहरुको मृत्यु भएको वर्षमा पनि कार्यक्रम स्थगित गरिएका थिए । तर अन्य कारणले भने यो नै पहिलो पटक हो– प्रवक्ता शर्माले भने ।

कांग्रेसले यस्तो कार्यक्रम थालेपछि अरु राजनीतिक दलहरुले समेत अन्य दिन पारेर यस्तै चियापान गर्ने गरेको छन् ।  देशमा वहुदलीय व्यवस्था पुनस्थापना भएयता यस्ता कार्यक्रम अझै महत्वपूर्ण र प्रभावकारी हुने गरेका छन् ।