यस्ता पनि प्रहरी ! बालिकालाई बिहे गर्ने भन्दै बलात्कारपछि हत्या प्रयास

१७ कार्तिक, डोटी । समाजको रक्षक भनेर प्रहरीलाई चिनिन्छ । सामाजिक सुरक्षामै प्रहरीको जीवन व्यतित हुन्छ । जहाँ प्रहरी छ, त्यहाँको समाज सुरक्षित मात्रै होइन, आफूलाई भाग्यमानी ठान्छ । आखिर प्रहरीको काम नै समाजमा शान्ति सुरक्षा कायम गर्ने हो ।

तर यो सबै प्रहरीको हकमा लागु नहुने रहेछ । केही प्रहरी, जो आफूलाई रक्षक भन्ठान्छन् । उनीहरु नै भक्षक भएको कुरुप दृष्टान्त डोटीमा देखिएको छ । १५ बर्षीया बालिकालाई प्रेम चक्करमा पारेर, बलात्कार गर्ने प्रहरी जवानले कुटी कुटी हत्या प्रयास गरेको घटना सार्वजनिक भएको छ ।

डोटीको गडसेरा अस्थायी प्रहरी चौकीमा कार्यरत प्रहरी जवान शुशिल सिंहले १५ बर्षिया बालिकालाई बलात्कारपछि हत्याको प्रयास गरेको खुलेको हो । तिन महिना देखि प्रेम चक्कर चलाएका उनले घरमै पुगेर जबर्जस्ती गरेपछि घरबाट पर बारीमा लिएर कुटी कुटी हत्या प्रयास गरेको खुलेको हो ।

डोटीको जोरायल गाउँपालिका वडा नं ५ की बालिकालाई जवान सिंहले कातिक १३ गते राती बलात्कार गरेका थिए । त्यसअघि उनले बिहेको आश्वासन देखाउँदै बलात्कार गर्दै आएका थिए । बालिकाले नाईनास्ती गर्दा पनि उनले बलात्कार गर्न नछाडेको पीडित बालिकाको भनाई छ ।

पछिल्लो समय उनले बलात्कारपछि पेटमा हानेर बालिकालाई कुटपिट गर्ने गरेका थिए । तीन दिनअघि उनले बालिकालाई घरमै गएर घिसारेर खेतमा लगेर बलात्कार गरेपछि पेटमा लात्तीले हानेर घाँटीमा डोरी लगाएर नजिकैको रुखमा झुण्ड्याएको पाइएको हो ।

पेटमा लात्तीले हान्दा बेहोस भएकी बालिका रातीको समयमा रुखमा झुण्डिएको अवस्थामा फेला परेकी थिइन् । उनी होस आउँदा चिच्याएपछि स्थानीयले उनको उद्दार गरेका थिए । उद्दारपश्चात प्रहरीले उजरी दर्ता गर्न नमान्दा पीडित बालिकाका आफन्त धनगढीमा उजुरी दर्ता गर्न पुगेका थिए ।

धनगढीको दबाबपछि जिल्ला प्रहरी कार्यालय डोटीले उजुरी दर्ता गरेर घटनाको अनुसन्धान शुरु गरेको छ ।